"ನೀ ನಂಗೆ ಅಲ್ಲವಾ" ಚಿತ್ರದ ನಾಯಕಿಯಾದ ಕಾಶಿಮಾ

"ನೀ ನಂಗೆ ಅಲ್ಲವಾ" ಚಿತ್ರದ ನಾಯಕಿಯಾದ ಕಾಶಿಮಾ

ಕನ್ನಡ, ತಮಿಳು, ತೆಲುಗು ಸೇರಿ ಬಹು ಭಾಷಾ ಚಿತ್ರರಂಗದಲ್ಲಿ ಮಿಂಚುತ್ತಿರುವ ನಟಿ ಕಾಶಿಮಾ ರಫಿ ಈಗ ಕನ್ನಡದ ಮತ್ತೊಂದು ಚಿತ್ರದಲ್ಲಿ ನಾಯಕಿಯಾಗಿ ಕಾಣಿಸಿಕೊಳ್ಳಲು ಸಿದ್ದವಾಗಿದ್ದಾರೆ. ಬೆಂಗಳೂರಿನಲ್ಲೇ ಹುಟ್ಟಿ ಬೆಳೆದಿರುವ ಅಪ್ಪಟ ಕನ್ನಡ ಪ್ರತಿಭೆ ಕಾಶಿಮಾ  "ನೀ ನಂಗೆ ಅಲ್ಲವಾ" ಚಿತ್ರದ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ.  ರೋರಿಂಗ್ ಸ್ಟಾರ್ ಶ್ರೀಮುರಳಿ ಹಾಗೂ ವಿದ್ಯಾ ಶ್ರೀಮುರಳಿ ಈ ಚಿತ್ರವನ್ನು ಪ್ರೆಸೆಂಟ್ ಮಾಡುತ್ತಿದ್ದರೆ  "ಮ್ಯಾಟ್ನಿ" ಚಿತ್ರದ ಖ್ಯಾತಿಯ ನಿರ್ಮಾಪಕರಾದ  ಎಸ್ ಪಾರ್ವತಿ ಗೌಡ, ಪವನ್ ಪರಮಶಿವಂ ಹಾಗೂ ಮನೋಹರ್ ಕಾಂಪಲ್ಲಿ ಈ ಚಿತ್ರದ ನಿರ್ಮಾಣ ಮಾಡುತ್ತಿದ್ದಾರೆ.   ಮನೋಜ್ ಪಿ ನಡಲುಮನೆ ನಿರ್ದೇಶನ ಈ ಸಿನಿಮಾಗಿದೆ.
ಕಾಶಿಮಾ ರಫಿ ಇದಕ್ಕೆ ಮುನ್ನ ಸೌತ್ ಇಂಡಿಯನ್ ಹೀರೋಸಿನಿಮಾದ ಮೂಲಕ ಕನ್ನಡ ಚಿತ್ರೋದ್ಯಮದಲ್ಲಿ ಮಿಂಚಿದ್ದರು. ಅಲ್ಲದೆ ಟೆಂಪರ್, ಕಸ್ತೂರಿ ಮಹಲ್ ನಲ್ಲಿ ಸಹ ಕಾಣಿಸಿಕೊಂಡಿದ್ದರು.
ಕಾಶಿಮಾ ಅವರ ತಂದೆ ರಫಿ ನಿರ್ಮಾಣ ಮತ್ತು ಗುತ್ತಿಗೆ ಕ್ಷೇತ್ರದ ಉದ್ಯಮಿಯಾಗಿದ್ದು ಕಾಶಿಮಾ ತಾವು ಮಾಡಲಿಂಗ್ ಕ್ಷೇತ್ರದಿಂದ ಸಿನಿಮಾ ರಂಗಕ್ಕೆ ಬಂದವರು, ಅವರು ಈ ಮುನ್ನ ಮಿಸ್ ಬೆಂಗಳೂರು ಸೌಂದರ್ಯ ಸ್ಪರ್ಧೆಯಲ್ಲಿ ರನ್ನರ್ ಅಪ್ ಆಗಿದ್ದರು.  
ಗಾಡ್ವಿನ್ ಪಬ್ಲಿಕ್ ಶಾಲೆಯಲ್ಲಿ ಪ್ರಾಥಮಿಕ ಶಿಕ್ಷಣ,  ಬೆಂಗಳೂರಿನ ಸಿಂಧಿ ಕಾಲೇಜಿನಲ್ಲಿ ಪದವಿ ಶಿಕ್ಷಣ ಮುಗಿಸಿದ ಕಾಶಿಮಾ "ಕಳಾಪುರಂ" ಎನ್ನುವ ತೆಲುಗು ಸಿನಿಮಾದಲ್ಲಿ ಹಾಗೂ "ಕಾದಂಬರಿ" ಎನ್ನುವ ತಮಿಳು ಸಿನಿಮಾಗಳಲ್ಲಿ ಸಹ ಅಭಿನಯಿಸಿದ್ದಾರೆ.  

"ನೀ ನಂಗೆ ಅಲ್ಲವಾ" ಚಿತ್ರದ ಮೂಲಕ  ರಾಹುಲ್ ಅರ್ಕಾಟ್ ಎಂಬ ನೂತನ ಪ್ರತಿಭೆ ಈ ಚಿತ್ರದ ಮೂಲಕ ನಾಯಕನಾಗಿ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡುತ್ತಿದ್ದಾರೆ. ಚಿತ್ರತಂಡ, ಈಗ ಚಿತ್ರದ ನಾಯಕಿಯ ಬಗ್ಗೆ ಮಾಹಿತಿ ನೀಡಿದೆ.  ಬೆಡಗಿ ಕಾಶಿಮಾ "ನೀ ನಂಗೆ ಅಲ್ಲವಾ" ಚಿತ್ರದ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ. ನೂತನ ಪೋಸ್ಟರ್ ಬಿಡುಗಡೆ ಮಾಡುವ ಮೂಲಕ ನಾಯಕಿ ಕಾಶಿಮಾ‌ ಅವರಿಗೆ ಚಿತ್ರತಂಡ ಸ್ವಾಗತ ಹೇಳಿದೆ.

-ರಾಘವೇಂದ್ರ ಅಡಿಗ ಎಚ್ಚೆನ್

2025 ಫೆಬ್ರವರಿ ತಿಂಗಳಲ್ಲಿ ಗೃಹ ಶೋಭಾ ಪತ್ರಿಕೆಯಲ್ಲಿ ಪ್ರಕಟವಾದ ಲೇಖನ 

ಮಂಡ್ಯ ಜಿಲ್ಲೆಯ ಮುಚ್ಚಿಟ್ಟ ರತ್ನ ಬೂದನೂರಿನ ಅವಳಿ ಹೊಯ್ಸಳ ದೇವಾಲಯಗಳು

 ನಾವು ನೀವೆಲ್ಲಾ ಬೆಂಗಳುರು ಮೈಸೂರು ನಡುವೆ ಸಾಕಷ್ಟು ಬಾರಿ ಓಡಾಡಿದ್ದೇವೆ. ಆದರೆ ರಾಜ್ಯ ಹೆದ್ದಾರಿ 17ರಲ್ಲಿ ಬರುವ ಮಂಡ್ಯದ ಸಮೀಪದ ಬೂದನೂರು ಎನ್ನುವ ಗ್ರಾಮದ ಕುರಿತು ನಾವೇನೂ ಅಷ್ಟು ಗಮನ ನೀಡಿರುವುದಿಲ್ಲ. ಇಲ್ಲಿ ಹಳೇ ಬೂದನೂರು ಹಾಗೂ ಹೊಸ ಬೂದನೂರು ಎನ್ನುವ ಎರಡು ಗ್ರಾಮಗಳಿದ್ದು  ನಿಜವಾಗಿ ಅದು ಒಂದು ಸಣ್ಣ ಕುಗ್ರಾಮ.  ಬುದನೂರು 650 ಹೆಕ್ಟೇರ್ ವ್ಯಾಪ್ತಿಯಲ್ಲಿದೆ.  ಸುಮಾರು ಹತ್ತು ಸಾವಿರ ಜನಸಂಖ್ಯೆಯನ್ನು ಹೊಂದಿದೆ!  ಮಂಡ್ಯ ಜಿಲ್ಲೆ ಮಂಡ್ಯ ನಗರ ಕೇಂದ್ರದಿಂದ ಸುಮಾರು  8 ಕಿ. ಮೀ. ದೂರದಲ್ಲಿ ನೆಲೆಯಾಗಿರುವ ಗ್ರಾಮ ಇದು. . ಬೆಂಗಳೂರಿನಿಂದ ಪ್ರಯಾಣಿಸುವಾಗ ನಿಮಗೆ ಮಂಡ್ಯ ತಲುಪುವುದಕ್ಕೆ ಮುನ್ನ ಬಲಭಾಗದ ತಿರುವಿನ;;ಇ ಈ ಗ್ರಾಮ ಸಿಗಲಿದೆ.  

ಈ ಗ್ರಾಮದ ಕುರಿತು ಇಷ್ಟೆಲ್ಲಾ ಪೀಠಿಕೆ ಹೇಳುವುದರ ಉದ್ದೇಶವೆಂದರೆ ಇಲ್ಲಿ  ಒಂದಲ್ಲ, 13ನೇ ಶತಮಾನದ ಎರಡು ಅದ್ಭುತ ದೇವಾಲಯಗಳಿದೆ. ಎರಡೂ ಹೊಯ್ಸಳರ ಕಾಲಕ್ಕೆ ಸೇರಿದ ದೇವಾಲಯಗಳಗಿದ್ದು  ಒಂದು-ಶ್ರೀ ಕಾಶಿ ವಿಶ್ವನಾಥ ದೇವಾಲಯವಾದರೆ ಇನ್ನೊಂದು-ಶ್ರೀ ಅನಂತಪದ್ಮನಾಭ ದೇವಾಲಯ ಆಗಿದೆ.
ಶ್ರೀ ಕಾಶಿ ವಿಶ್ವನಾಥ ದೇವಾಲಯ.1276ರ ಹೊಯ್ಸಳ ರಾಜವಂಶದ ದೆವಾಲಯವಾಗಿದ್ದು  ದೇವಾಲಯದ ಕಲ್ಲಿನ ಗೋಡೆಗಳ ಮೇಲೆ ವಿವಿಧ ವಿನ್ಯಾಸದ ಬರಹಗಳು, ರೇಖಾಚಿತ್ರಗಳು ಗೋಚರಿಸುತ್ತವೆ, ಕೆಲವು ಶಿಲ್ಪಗಳು ಅಪೂರ್ಣವಾಗಿದೆ ಅಥವಾ ಮುರಿದಂತಿದೆ. ಇಷ್ಟಾಗಿಯೂ ಭಗವಾನ್ ಶಿವನಿಗೆ ಸಮರ್ಪಿತವಾದ ಶ್ರೀ ಕಾಶಿ ವಿಶ್ವನಾಥ ದೇವಾಲಯ ಭವ್ಯವಾಗಿದ್ದು ಮನ ಸೆಳೆಯುತ್ತದೆ.  ಇದು ಏಕಕೂಟ ಹೊಯ್ಸಳ ದೇವಾಲಯ, ಅಂದರೆ ಪೂರ್ವಕ್ಕೆ ಮುಖ ಮಾಡಿದ್ದು  ಎತ್ತರದ ವೇದಿಕೆಯ ಮೇಲೆ ಇರುವ ಒಂದು ದೇವಾಲಯ!
ಈ ದೇವಾಲಯವನ್ನು ನಿರ್ಮಿಸಿದವರು  ಹೊಯ್ಸಳ ರಾಜವಂಶದ ಕೊನೆಯ ರಾಜರಲ್ಲಿ ಒಬ್ಬರಾದ ಮೂರನೇ ವೀರ ಬಲ್ಲಾಳ (1292-1343) ಭಗವಾನ್ ಶಿವ ಇಲ್ಲಿ ಲಿಂಗ ರೂಪದಲ್ಲಿ ನೆಲೆಸಿದ್ದಾನೆ. ಭಗವಂತನ ಇಬ್ಬರು ಪುತ್ರರಾದ ಗಣಪತಿ ಮತ್ತು ಸುಬ್ರಹ್ಮಣ್ಯ ಅವನ ಅಕ್ಕ ಪಕ್ಕ ನೆಲೆಸಿದ್ದಾರೆ.  ಲಿಂಗಕ್ಕೆ ಎದುರಾಗಿ, ಅತ್ಯಂತ ಸುಂದರವಾದ ನಂದಿಯನ್ನು ಕಾಣಬಹುದು. ಈ ದೇವಾಲಯವನ್ನು ಸಂಪೂರ್ಣವಾಗಿ ಕೆತ್ತನೆ ಮಾಡಿದ ಕಲ್ಲಿನಿಂದ ನಿರ್ಮಿಸಲಾಗಿದೆ! ಈ ದೇವಾಲಯವು 'ಸಪ್ತ ಮಾತೃಕೆಯರ’ ಮೂರ್ತಿಯನ್ನೂ ಸಹ ಒಳಗೊಂಡಿದೆ.ಋಗ್ವೇದದಲ್ಲಿ ಉಲ್ಲೇಖಿಸಲಾದ 7 ತಾಯಂದಿರು. ಇದು ಪಾರ್ವತಿ ದೇವಿಯಿಂದ ಪ್ರಾರಂಭವಾಗಿ ಆಕೆಯ ಮಗನಾದ ಗಣೇಶನೊಂದಿಗೆ ಕೊನೆಗೊಳ್ಳುವ 9 ಪ್ರತಿಮೆಗಳ ಕಲ್ಲಿನ ಫಲಕದಲ್ಲಿ ಇದನ್ನು ಕೆತ್ತಲಾಗಿದೆ. ಸಭಾಮಂಟಪದಲ್ಲಿನ ಛಾವಣಿಗಳು ಹೆಚ್ಚು ಅಲಂಕೃತವಾಗಿವೆ. ಇಲ್ಲಿ ಮೇಲ್ಛಾವಣಿಯನ್ನು ಮೂಲತಃ ಚಿತ್ರಿಸಲಾಗಿದೆ ಎಂದು ಸಹ ನೋಡಬಹುದು ಏಕೆಂದರೆ ಕೆಲವು ಲಕ್ಷಣಗಳು ಇನ್ನೂ ಕೆಂಪು ಬಣ್ಣದಲ್ಲಿ ಕಂಡುಬರುತ್ತವೆ. ಕಲ್ಲಿನ ಪುಡಿ, ಹೂವಿನ ಸಾರ ಇತ್ಯಾದಿಗಳನ್ನು ಬೆರೆಸಿ ತಯಾರಿಸಿದ ನೈಸರ್ಗಿಕ ಬಣ್ಣವು ಈಗ 800 ವರ್ಷಗಳಿಂದ ಉಳಿದುಕೊಂಡಿದೆ!
ಇನ್ನು ಅನಂತಪದ್ಮನಾಭ ದೇವಾಲಯವನ್ನು ನಕ್ಷತ್ರಾಕಾರದ ವೇದಿಕೆಯ ಮೇಲೆ ನಿರ್ಮಿಸಲಾಗಿದೆ. ಬೇಲೂರು, ಹಳೆಬೀಡಿನಂತೆ ಈ ದೇವಸ್ಥಾನ ಕೂಡ ಏಕಕೂಟ ದ್ರಾವಿಡ ಮಾದರಿಯ ದೇವಸ್ಥಾನವಾಗಿದೆ ದೇವಾಲಯದ ಪ್ರವೇಶದ್ವಾರವು ಮುಖಮಂಟಪ ಎಂದು ಕರೆಯಲ್ಪಡುವ ಸ್ತಂಭದ ಮುಖಮಂಟಪದ ಮೂಲಕ ಹಾದು ಹೋಗುತ್ತದೆ. ಇದು ಅಲಂಕೃತ ದ್ವಾರದ ಮೂಲಕ ಯಾವುದೇ ಕಿಟಕಿಗಳಿಲ್ಲದ ಮುಚ್ಚಿದ ಸಭಾಂಗಣಕ್ಕೆ ಕರೆದೊಯ್ಯುತ್ತದೆ. ಇದು  ಗರ್ಭಗೃಹಕ್ಕೆ (ಗರ್ಭಗೃಹ) ಸಂಪರ್ಕಿಸುತ್ತದೆ. ಅಂತರಾಳ ಮತ್ತು ಗರ್ಭಗೃಹ ಎರಡರ ದ್ವಾರಗಳು ಅಲಂಕೃತವಾಗಿವೆ ಮತ್ತು ಬಹು ವಿಧದ ವಿನ್ಯಾಸವನ್ನು ಹೊಂದಿದೆ. ಅಂತರಾಳದ ದ್ವಾರದ ಎರಡೂ ಬದಿಗಳಲ್ಲಿ ಎರಡು ಉಪ ಗುಡಿಗಳಿದ್ದು   ಇವುಗಳಲ್ಲಿ ಗಣೇಶ ಮತ್ತು ಲಕ್ಷ್ಮಿಯ ಸಣ್ಣ ವಿಗ್ರಹಗಳಿವೆ. ಗರ್ಭಗೃಹವು ಸುಂದರವಾಗಿ ಕೆತ್ತಿದ ಅನಂತ ಪದ್ಮನಾಭ  ವಿಗ್ರಹವನ್ನು ಹೊಂದಿದೆ  ಮತ್ತು ಇತರ ದೇವಾಲಯಗಳಲ್ಲಿ ಕಂಡುಬರುವ ವಿಶಿಷ್ಟವಾದ ಮಲಗುವ ಭಂಗಿಗಿಂತ ಭಿನ್ನವಾಗಿ ನಿಂತಿರುವ ಭಂಗಿಯಲ್ಲಿ ಅನಂತಪದ್ಮನಾಭನನ್ನು ನಾವಿಲ್ಲಿ ಕಾಣುತ್ತೇವೆ. ಅನಂತಪದ್ಮನಾಭ ಮೂರ್ತಿಯು ಸ್ಥಾನಿಕ ಮೂರ್ತಿಯಾಗಿರುವುದು ಇಲ್ಲಿನ ವಿಶೇಷ.  6 ಅಡಿ ಎತ್ತರದ ಪದ್ಮನಾಭ ಮಂದಸ್ಮಿತನಾಗಿದ್ದು, ಪದ್ಮ, ಚಕ್ರ, ಗಧಾ ಹಾಗೂ ಶಂಖುಧಾರಿಯಾಗಿದ್ದಾನೆ.   ಚಿಕ್ಕದಾದ ಶ್ರೀದೇವಿ ಮತ್ತು ಭೂದೇವಿ (ಅವರ ಪತ್ನಿಯರು) ದೇವತೆ ಮೂರ್ತಿಗಳು ಪಾರ್ಶ್ವದಲ್ಲಿದೆ.  
ಸಭಾಮಂಟಪದಲ್ಲಿರುವ ಕಂಬಗಳನ್ನು ಚೆನ್ನಾಗಿ ಕೆತ್ತಲಾಗಿದೆ. ಹೊರಗಿನ ಗೋಡೆಗಳು ಯಾವುದೇ ಶಿಲ್ಪಗಳಿಂದ ಕೂಡಿರುವುದಿಲ್ಲ.  ಗರ್ಭಗುಡಿಯ ಮೇಲಿರುವ ವಿಮಾನ (ಗೋಪುರ) ಕೂಡ  ಚಿಕ್ಕದಾಗಿದೆ. ವಿಶೇಷ ಎಂದರೆ ಕೇರಳದ ಅತ್ಯಂತ ಪುರಾತನ ಹಾಗೂ ಶ್ರೀಮಂತ ದೇಗುಲ ಶ್ರೀ ಅನಂತಪದ್ಮನಾಭ ದೇಗುಲದ ನಂತರ ಮಂಡ್ಯದ ಬೂದನೂರಿನಲ್ಲಿರುವ ಈ ಅನಂತಪದ್ಮನಾಭ ದೇವಸ್ಥಾನವನ್ನ ಪುರಾತನ ದೇವಸ್ಥಾನ ಎಂದು ಹೇಳಲಾಗುತ್ತದೆ.
ಗ್ರಾಮವು ತನ್ನದೇ ಆದ ಕೋಟೆ ಗೋಡೆಗಳನ್ನು ಹೊಂದಿದ್ದು, ಅದರ ದ್ವಾರ ಮಾತ್ರ ಇಂದು ಉಳಿದುಕೊಂಡಿದೆ.
ಇನ್ನುಇಷ್ಟೆಲ್ಲಾ ಐತಿಹಾಸಿಕ ಮಹತ್ವದ ಸ್ಥಳವಾಗಿ ಪ್ರಾಚೀನ ದೇವಾಲಯ, ಶಿಲ್ಪ ಸೌಂದರ್ಯದ ದೇವಸ್ಥಾನಗಳನ್ನು ಹೊಂದಿರುವ ಬೂದನೂರಿನ ಕುರಿತು ಇನ್ನೂ ಸಾಕಹ್ಶ್ತು ಜನರಿಗೆ ಮಾಹಿತಿ ಇಲ್ಲ. ಪ್ರವಾಸೋದ್ಯಮ ಇಲಾಖೆ ಇತ್ತೀಚೆಗೆ ಮಂಡ್ಯ ಜಿಲ್ಲೆಯ ಈ ಸ್ಥಳವನ್ನು ಪ್ರವಾಸ ಮಾಹಿತಿ ಕೋಶದಲ್ಲಿ ಸೇರಿಸಿದೆ. ಮುಂಬರುವ ದಿನಗಳಲ್ಲಿ ಮತ್ತಷ್ಟು ಮೂಲಭೂತ ಅವಶ್ಯಗಳ ಅಭಿವೃದ್ದಿ ಮಾಡಿ ಪ್ರವಾಸಿ ಮಾಹಿತಿ ಸಿಕ್ಕುವಂತೆ ಕ್ರಮ ವಹಿಸಿದರೆ ಮುಂದೊಂದು ದಿನ ಇದು ಪ್ರಮುಖ ಪ್ರವಾಸಿ ತಾಣವಾಗುವುದರಲ್ಲಿ ಎರಡು ಮಾತಿಲ್ಲ.

-ರಾಘವೇಂದ್ರ ಅಡಿಗ ಎಚ್ಚೆನ್.

ಸಿನಿಮಾ ಒಂದು ನೋಡುವ ಪುಸ್ತಕ; TS ನಾಗಾಭರಣ

 

"ಸಿನಿಮಾ ಒಂದು ನೋಡುವ ಪುಸ್ತಕ. ಈ ಪುಸ್ತಕವನ್ನು ಆತ ಒಬ್ಬನೇ ನೋಡಲ್ಲ. ಬದಲಾಗಿ ಆತನ ಬೆಂಬಲಿಗರು ಕೂಡ ನೋಡುತ್ತಾರೆ. ಹೀಗಾಗಿ ಸಿನಿಮಾದ ಸೋಲು ಗೆಲುವು ಎಲ್ಲರನ್ನೂ ಒಳಗೊಂಡಿರುತ್ತದೆ," ಎಂದು ಖ್ಯಾತ ಚಲನಚಿತ್ರ ನಿರ್ದೇಶಕ ಟಿ.ಎಸ್ ನಾಗಾಭರಣ ಅವರು ಹೇಳಿದರು.

ಸ್ನೇಹ ಬುಕ್ ಹೌಸ್ ವತಿಯಿಂದ 2025 ಮಾರ್ಚ್ 02 ಭಾನುವಾರದಂದು ಕನ್ನಡ ಸಾಹಿತ್ಯ ಪರಿಷತ್ತಿನ ಕುವೆಂಪು ಸಭಾಂಗಣದಲ್ಲಿ ಲೇಖಕ ವಿರಾಟ್ ಪದ್ಮನಾಭ ಅವರ "ಬೆಟ್ಟದ ಹೂವು" ಆಧುನಿಕ ಭಾರತದ ಸಾಮಾಜಿಕ ರಾಮಾಯಣ ಕೃತಿಯನ್ನು ಲೋಕಾರ್ಪಣೆಗೊಳಿಸಿ ಅವರು ಮಾತನಾಡಿದರು.

"ಇಂದಿಗೂ ನಾವು ಸಿನಿಮಾದ ಕಲಾಕೃತಿಗಳನ್ನು ಕಟ್ಟಿಕೊಟ್ಟಂತಹ ಅದೆಷ್ಟೋ ಜನರನ್ನ ನಾವು ನೆನಪುಮಾಡಿಕೊಳ್ಳುತ್ತೇವೆ. ಅದಕ್ಕೆ ಮುಖ್ಯ ಕಾರಣ ಅಂದಿನ ಸಿನಿಮಾದ ಜೀವಂತ ವಸ್ತು. ಸಮಾಜ ಸುಧಾರಣೆಯಾಗುವುದು ಎಡ ಬಲದಿಂದವಲ್ಲ. ಮಧ್ಯವ ವರ್ಗದಿಂದ ಎನ್ನುವ ಮಾತುಗಳು ಈ ಕೃತಿಯಲ್ಲಿಯೂ ನೋಡಬಹುದು. ಅದು ಇಂದಿನ ಕಾಲಕ್ಕೆ ನಿಜವೆಂಬುವುದು ಕೂಡ ಭಾಸವಾಗುತ್ತದೆ. ಸರಕಾರಿ ಶಾಲೆಗಳ ಉಳಿವಿಕೆಯ ಹೋರಾಟ ಒಂದು ರೀತಿಯ ಸ್ಥಾಯಿಕ ಭಾವವಾಗಿ ಇಲ್ಲಿ ಕಾಣಬಹುದು. ಸಿನಿಮಾ ಅನ್ನುವುದು ಓದು. ವಿಮರ್ಶಕ ಅನ್ನುವವ ಇದನ್ನು ಮನದಲ್ಲಿಟ್ಟುಕೊಂಡು ಸಿನಿಮಾ ವಿಮರ್ಶೆಯನ್ನು ಸಾಹಿತ್ಯ ಲೋಕಕ್ಕೆ ನೀಡಬೇಕು. ಪ್ರಸ್ತುತ ಕಾಲಘಟ್ಟದಲ್ಲಿ ಇಂತಹದ ಅವಶ್ಯಕತೆಯಿದೆ ಬಹಳಷ್ಟಿದೆ," ಎಂದು ತಮ್ಮ ಅಭಿಪ್ರಾಯವನ್ನು ವ್ಯಕ್ತಪಡಿಸಿದರು.

ಕೃತಿಯನ್ನು ವಿಶ್ಲೇಷಿಸಿದ ವಕೀಲ, ಪತ್ರಕರ್ತ ವೀರೇಂದ್ರ ಪಿ.ಎಂ. ಮಾತನಾಡಿ, "ಒಬ್ಬ ಕವಿ, ನಾಟಕಕಾರ ಕೃತಿಕಾರನ ಬಗ್ಗೆ ಕೃತಿ ಪ್ರಕಟವಾಗಲ್ಲವೋ, ಹಾಗೆಯೇ ಸಿನಿಮಾ ಕ್ಷೇತ್ರದಲ್ಲಿಯೂ ವ್ಯಕ್ತಿಯ ಬಗ್ಗೆ ಇರುವಂತಹ ಕೃತಿಗಳು ಬಹಳಷ್ಟು ಕಡಿಮೆ. ಆದರೆ ನಾಗಭರಣ ಅವರ ಬಗ್ಗೆ ಪದ್ಮನಾಭ ಅವರು ಬಹಳಷ್ಟು ಅಧ್ಯಯನ ಮಾಡಿ ಕೃತಿಯನ್ನು ಬರೆದಿದ್ದಾರೆ. ಇಂತಹ ಅಧ್ಯನಶೀಲ, ವ್ಯಕ್ತಿ ವಿಮರ್ಶೆಯ ಕೃತಿಗಳ ಕನ್ನಡ ಸಾಹಿತ್ಯಕ್ಕೆ ಅವಶ್ಯಕ. ಇನ್ನು ಬೆಟ್ಟದ ಜೀವ ಕೃತಿಯ ಮೂಲಕ ಕನ್ನಡ ಸಾಹಿತ್ಯಕ್ಕೆ ಪದ್ಮನಾಭ ಅವರು ನುಡಿಗಟ್ಟುಗಳನ್ನು ಕೊಟ್ಟಿದ್ದಾರೆ. ಮುಖ್ಯವಾಗಿ ನಾವು ಕೃತಿಯಲ್ಲಿ ಗಮನಿಸಬೇಕಾದ ಅಂಶ ಸರಕಾರಿ ಶಾಲೆಗಳ ಬಗೆಗೆ ಕಟ್ಟಿಕೊಟ್ಟಿರುವ ವಿಚಾರ ವಸ್ತುಗಳು. ಈ ನಿಟ್ಟಿನಲ್ಲಿ ಬದುಕಿನ ವಿವಿಧ ಮಜಲುಗಳನ್ನು ತಿಳಿಸಿಕೊಟ್ಟಿದ್ದಾರೆ. ಕಲಾತ್ಮಕ ಸಿನಿಮಾಗಳ ಬಗ್ಗೆ ಬಹಳ ವಿಸ್ತಾರವಾಗಿ ಚರ್ಚಿಸಿದ್ದಾರೆ. ಕನ್ನಡ ಸಾಹಿತ್ಯ ಪರಂಪರೆ ಮತ್ತು ಕನ್ನಡ ಸಿನಿಮಾ ಪರಂಪರೆಯ ಬಗ್ಗೆ ಬಹಳ ಸ್ಥೂಲವಾಗಿ ವಿವರಿಸಲಾಗಿದೆ," ಎಂದು ತಿಳಿಸಿದರು.

ಕೃತಿಯ ಲೇಖಕ ವಿರಾಟ್ ಪದ್ಮನಾಭ ಮಾತನಾಡಿ, "ಬೆಟ್ಟದ ಜೀವ ಧರ್ಮ, ನೆಲೆಯನ್ನು ನೋಡುವ ರೀತಿ ಬಹಳ ಭಿನ್ನವಾಗಿ ವ್ಯಕ್ತವಾಗುತ್ತದೆ. ಪುನೀತ್ ರಾಜಕುಮಾರ್ ಅವರ ಸಿನಿಮಾವನ್ನು ಒಳಗೊಂಡ ವಿಚಾರ ವಸ್ತುಗಳಿವೆ. ಈ ಕೃತಿ ಹೊರಬರಲು ನನ್ನ ವಿದ್ಯಾರ್ಥಿ ವೃಂದವೇ ಮುಖ್ಯ. ಸದಾ ಅವರು ನನ್ನ ಬೆನ್ನೆಲುಬಾಗಿ ನಿಂತಿದ್ದಾರೆ," ಎಂದರು.

ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದ ಆಕಾಶವಾಣಿಯ ಹಿರಿಯ ಉದ್ಘೋಷಕಿ ಬಿ.ಕೆ ಸುಮತಿ ಅವರು ಸ್ಪೂರ್ತಿಯ ಮಾತುಗಳನ್ನಾಡಿದರು.

ವೇದಿಕೆಯಲ್ಲಿ ತ್ರಿವೇಣಿ ಹರ್ಷಿತಾ ಅವರು ಉಪಸ್ಥಿತರಿದ್ದರು.

Movie Review: ದುರ್ಬಲ ಕಥೆ, ಡಬ್ಬಿಂಗ್ ನಲ್ಲಿನ ದೋಷದಿಂದ ಬೇಸರ ತರಿಸುವ 1990s

 ನಂದಕುಮಾರ್ ಸಿ. ಎಂ. ನಿರ್ದೇಶನದ ಅರುಣ್ ಕುಮಾರ್ ಮತ್ತು ರಾಣಿ ವರದ್ ಅಭಿನಯದ  ಮನಸು ಮಲ್ಲಿಗೆ ಕಂಬೈನ್ಸ್ ನಿರ್ಮಾಣದ ಹೊಸಬರ ತಂಡದ ಚಿತ್ರ 1990s ಈ ವಾರ ಬಿಡುಗಡೆ ಆಗಿದೆ.  ಚಿತ್ರಕ್ಕೆ  ಮಹಾರಾಜ ಸಂಗೀತ ನಿರ್ದೇಶಕರಾದರೆ, ಹಾಲೇಶ್ ಛಾಯಾಗ್ರಾಹಣವಿದೆ. ಸಾಹಸ ನಿರ್ದೇಶಕ ಅಶೋಕ್, ನೃತ್ಯ ಸಂಯೋಜಕ ಸಾದಿಕ್ ಸರ್ದಾರ್ ಚಿತ್ರದ ಜೊತೆಗಿದ್ದಾರೆ. ಅಲ್ಲದೆ ಕೃಷ್ಣ  ಈ ಚಿತ್ರದ ಎಡಿಟಿಂಗ್ ಮಾಡಿದ್ದಾರೆ.  ತಮಿಳು, ತೆಲುಗು, ಮಲಯಾಳಂ ಮತ್ತು ಹಿಂದಿ ಸೇರಿದಂತೆ ಅನೇಕ ಭಾಷೆಗಳಿಗೆ ಡಬ್ ಆಗುತ್ತಿರುವ ಈ ಚಿತ್ರದಲ್ಲಿ ನಾಯಕ ಹಾಗೂ ನಾಯಕಿ ಇಬ್ಬರೂ ಕನ್ನಡ ಚಿತ್ರರಂಗಕ್ಕೆ ಪ್ರವೇಶಿಸುತ್ತಿದ್ದಾರೆ. 

ಶೀರ್ಷಿಕೆಯೇ ಹೇಳಿದಂತೆ  ಈ ಚಿತ್ರವು 1990ರ ದಶಕದ್ದಾಗಿದೆ. ಬೇರೆ ಬೇರೆ ಜಾತಿಗಳ ಇಬ್ಬರು ಪ್ರೇಮಿಗಳ ಸುತ್ತ ಸುತ್ತುವ ಪ್ರೇಮ ಕಥೆಯನ್ನು ಹೊಂದಿದೆ. ಹೌದು, ಇದು ಪರಿಚಿತ ಅಂತರ-ಜಾತಿಯ ಪ್ರೀತಿಯ ಕಥೆ. ವಿಶೇಷವಾಗಿ ಹಳ್ಳಿಯ ಪರಿಸರದಲ್ಲಿ ಇಂತಹಾ ಪ್ರೀತಿ ಪ್ರೇಮದಿಂದ ಉಂತಾಗುವ ಸಮಸ್ಯೆಯನ್ನು ಇಲ್ಲಿ ಚಿತ್ರಿಸಲಾಗಿದೆ.

1990ರ ದಶಕವು ಆ ಯುಗದ ಭಾವನಾತ್ಮಕ ಪ್ರೇಮ ಕಥೆಯನ್ನು ನೆನಪಿಸುವ ಜನರೊಡನೆ ಪ್ರಾರಂಭವಾಗುತ್ತದೆ. ಅರುಣ್ ಕುಮಾರ್ ಮುಖ್ಯ ಪಾತ್ರದಲ್ಲಿದ್ದರೆ, ರಾಣಿ ವರದ್ ಆತನ ಪ್ರೇಮಿ ಪ್ರತಿಭಾ ಆಗಿ ನಟಿಸಿದ್ದಾರೆ. ಈ ಕಥೆಯು ಒಂದು ಫ್ಲ್ಯಾಶ್ ಬ್ಯಾಕ್ ಹೊಂದಿದೆ. -ಪಾಪು (ಅರುಣ್) ತನ್ನ ಬಾಲ್ಯದಲ್ಲಿ ಪ್ರತಿಭಾಳನ್ನು ಯಾವತ್ತೂ ತಿರಸ್ಕಾರದಿಂದ ಕಾಣುತ್ತಿದ್ದ ಮತ್ತು ಆಗಾಗ್ಗೆ  ಅವಳಿಗೆ ದೈಹಿಕವಾಗಿ ಹಿಂಸೆ ಕೊಡುತ್ತಿದ್ದ.  ಆದಾಗ್ಯೂ, ಅವನು ದೊಡ್ದವನಾದ ನಂತರ ಅವಳನ್ನು ಹುಚ್ಚನಾಗಿ ಪ್ರೀತಿಸುತ್ತಿರುತ್ತಾನೆ ಆಗ  ಅವನಲ್ಲಿ ಏನೋ ಬದಲಾವಣೆ ಆಗಿರುತ್ತದೆ.

ಅವನ ಹಿಂಸೆಯ ಹೊರತಾಗಿಯೂ ತನ್ನ ಬಾಲ್ಯದಲ್ಲಿಯೂ ಸಹ ತಾನು  ಅವನನ್ನು ಪ್ರೀತಿಸಿದ್ದೆ ಎಂದು ಪ್ರತಿಭಾ ಒಪ್ಪಿಕೊಂಡಾಗ, 1990s ನಾಟಕೀಯ ತಿರುವುಗಳ ಸರಣಿಯನ್ನು ತೆಗೆದುಕೊಳ್ಳುತ್ತದೆ. ಇಬ್ಬರೂ ಸಾಮಾಜಿಕ ಒತ್ತಡಗಳನ್ನು ಜಯಿಸಿ ತಮ್ಮ ಸಂತೋಷವನ್ನು ಕಂಡುಕೊಳ್ಳುತ್ತಾರೆಯೇ ಅಥವಾ ಅದೃಷ್ಟವು ಬೇರೆ ಹೇಗಿರಲಿದೆ ಎನ್ನುವುದನ್ನು ನೀವು ಸಿನಿಮಾ ನೋಡಿ ತಿಳಿಯಬೇಕು.

1990s ಚಿತ್ರದ ನಿರೂಪಣೆ, ಅಭಿನಯ ಅಥವಾ ಇತರ ಅಂಶಗಳ ಹೊರತಾಗಿಯೂ, ಛಾಯಾಗ್ರಾಹಕ ಎಸ್. ಹಾಲೇಶ್ ಕೆಲಸಕ್ಕೆ ಮೆಚ್ಚುಗೆ ಸೂಚಿಸಬೇಕಿದೆ.. ಕಥೆಯಲ್ಲಿ ತಿರುಳಿಲ್ಲದೆ ಹೋದರೂ ಆಯಾಗ್ರಾಹಣದಲ್ಲಿ ಮೂಡುವ ದೃಶ್ಯಗಳು ಮನಸೆಳೆಯುತ್ತದೆ. ಈ ಮಟ್ಟಿಗೆ 1990s ಬೆರಗುಗೊಳಿಸುತ್ತದೆ, . ಒಂದೆರಡು ಹಾಡುಗಳು ಚಿತ್ರದ ಕಥೆಗೆ ಪೂರಕವಾಗಿವೆ.

ಈಗ, 1990s  ವೀಕ್ಷಿಸುವುದು ಏಕೆ ಕಷ್ಟವಾಗಲಿದೆ ಎನ್ನುವುದನ್ನು ಹೇಳುವುದಾದರೆ  ನಿರೂಪಣೆ ಮತ್ತು ನಟನೆ ಅಸ್ವಾಭಾವಿಕ ರೀತಿಯಲ್ಲಿದ್ದು ಅತಿಯಾದ ಸ್ವ-ನಿರೂಪಣೆಯು, ಬೇಸರ ತರಿಸಿದೆ. ಜೊತೆಗೆ ಡಬ್ಬಿಂಗ್ ನಲ್ಲಿ ಸಾಕಷ್ಟು ದೋಷಗಳು ಎದ್ದು ಕಾಣುತ್ತದೆ.  ಬೇಸರದ ಸಂಗತಿ ಎಂದರೆ ಇದು ಇಡೀ ಚಿತ್ರದಲ್ಲಿ ಮುಂದುವರಿದಿದೆ. ವಿಭಿನ್ನವಾದದ್ದನ್ನು ಹೇಳುವ ಉದ್ದೇಶವು ಸ್ಪಷ್ಟವಾಗಿದ್ದರೂ, ನಿರಾಶೆ ಬೇಗನೇ ಅವರಿಸುತ್ತದೆ. ಸಾಮಾನ್ಯ ಕಥೆಯನ್ನು ಅವ್ಯವಸ್ಥಿತವಾಗಿ ಹೇಳಕಾಗಿದೆ ಅಲ್ಲದೆ  ಅನನುಭವಿ ನಟರೊಂದಿಗೆ ಅದನ್ನು ಪರದೆಯ ಮೇಲೆ ತಂದಿರುವ ರೀತಿ ಪ್ರೇಕ್ಷಕನ ಅನಾಸಕ್ತಿಗೆ ಪ್ರಮುಖ ಕಾರಣವಾಗಲಿದೆ. 

ಆಕರ್ಷಕವಾದ ಛಾಯಾಗ್ರಹಣದ ಹೊರತಾಗಿಯೂ, 1990s  ದುರ್ಬಲ ನಿರೂಪಣೆ,  ಅನನುಭವಿ ನಟರ ನಟನೆ ಮತ್ತು ದುರ್ಬಲ ಕಥೆಯೊಡನೆ ಸಾಗುತ್ತದೆ, ಆಸಕ್ತಿದಾಯಕ ಪ್ರಾರಂಭ ಕಂಡ ಚಿತ್ರ ಅಂತಿಮವಾಗಿ ಉತ್ಪ್ರೇಕ್ಷಿತ ಕಥೆ ಎನಿಸುತ್ತದೆ.

ಇತಿಹಾಸದಲ್ಲೇ ಮೊದಲ ಬಾರಿಗೆ ಶಕ್ತಿಸೌಧದಲ್ಲಿ ಸಾಹಿತ್ಯ ಜಾತ್ರೆ: ಪುಸ್ತಕ ಮೇಳಕ್ಕೆ ಸಿಎಂ ಸಿದ್ದರಾಮಯ್ಯ ಚಾಲನೆ

 ಇತಿಹಾಸದಲ್ಲೇ ಮೊದಲ ಬಾರಿಗೆ ಶಕ್ತಿಸೌಧದಲ್ಲಿ ಸಾಹಿತ್ಯ ಜಾತ್ರೆ: ಪುಸ್ತಕ ಮೇಳಕ್ಕೆ ಸಿಎಂ ಸಿದ್ದರಾಮಯ್ಯ ಚಾಲನೆ

- ರಾಘವೇಂದ್ರ ಅಡಿಗ ಎಚ್ಚೆನ್.

ಇತಿಹಾಸದಲ್ಲೇ ಪ್ರಪ್ರಥಮ ಬಾರಿಗೆ ಶಕ್ತಿಸೌಧದಲ್ಲಿ ಸಾಹಿತ್ಯ ಜಾತ್ರೆ ಆಯೋಜನೆ ಮಾಡಲಾಗಿದ್ದು, ಇಂದಿನಿಂದ 5 ದಿನ ನಡೆಯಲಿರುವ ಪುಸ್ತಕ ಮೇಳಕ್ಕೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಚಾಲನೆ ನೀಡಿದ್ದಾರೆ. ಈ ವೇಳೆ ಶಕ್ತಿ ಸೌಧದ ಮುಂದೆ ಸ್ಪೀಕರ್ ಯು ಟಿ‌ ಖಾದರ್ ಸಾಹಿತ್ಯದ ತೇರು ಎಳೆದಿದ್ದಾರೆ.

ಕರ್ನಾಟಕ ವಿಧಾನಸಭಾ ಸಚಿವಾಲಯ, ದೇಶದಲ್ಲಿಯೇ ಮೊದಲ ಬಾರಿಗೆ ವಿಧಾನಸೌಧದ ಆವರಣದಲ್ಲಿ ಪುಸ್ತಕ ಮೇಳವನ್ನು ಆಯೋಜಿಸಿದೆ. ಅಧಿಕೃತವಾಗಿ ಇಂದು ಸಂಜೆಯಿಂದಲೇ ಐದು ದಿನಗಳ ಕಾಲ ಈ ಪುಸ್ತಕ ಮೇಳ ಶುರುವಾಗಿದೆ. ಪುಸ್ತಕ ಮೇಳಕ್ಕೆ ಸಿಎಂ ಸಿದ್ದರಾಮಯ್ಯ, ಡಿಸಿಎಂ ಡಿಕೆ ಶಿವಕುಮಾರ್ ಚಾಲನೆ ನೀಡಿದ್ದರು, ಯುಟಿ ಖಾದರ್, ಬಸವರಾಜ್ ಹೊರಟ್ಟಿ ಸಹ ಭಾಗಿಯಾಗಿದ್ದರು.

ಪುಸ್ತಕ ಮತ್ತು ಸಾಹಿತ್ಯದ ಓದು ಮನುಷ್ಯನನ್ನು ಹೆಚ್ಚೆಚ್ಚು ಮಾನವೀಯಗೊಳಿಸುತ್ತದೆ. ಆದ್ದರಿಂದ ಎಲ್ಲರೂ ಓದುವ ಅಭ್ಯಾಸ ಹೆಚ್ಚಿಸಿಕೊಳ್ಳಬೇಕು.

ವಿಧಾನಸೌಧದಲ್ಲಿ ಓದುಗರ, ಸಾಹಿತ್ಯಾಸಕ್ತರ ಹಬ್ಬ ಆಯೋಜಿಸಲಾಗಿದೆ. ಇದನ್ನು ಸಾಹಿತ್ಯಾಸಕ್ತರು ಸದುಪಯೋಗ ಪಡಿಸಿಕೊಳ್ಳಬೇಕು. 
ಇನ್ನು ಮುಂದೆ ಪ್ರತೀ ವರ್ಷ ವಿಧಾನಸೌಧದಲ್ಲಿ ಸಾಹಿತ್ಯ, ಪುಸ್ತಕ ಹಬ್ಬ ನಡೆಸಲಾಗುವುದು‌.

ಸಾಹಿತ್ಯದ ಓದು ಮನುಷ್ಯನನ್ನು ಹೆಚ್ಚೆಚ್ಚು ಮಾನವೀಯಗೊಳಿಸುತ್ತದೆ.
ಪುಸ್ತಕಗಳನ್ನು ಖರೀದಿಸಿ, ಮನೆ ಮನೆಯಲ್ಲಿ ಗ್ರಂಥಾಲಯ ಮಾಡಿಕೊಳ್ಳಬೇಕು.
ಮಕ್ಕಳು ಮೊಬೈಲ್ ಮತ್ತು ಇಂಟರ್ನೆಟ್ ಚಟದಿಂದ ಹೊರಗೆ ಬಂದು ಪುಸ್ತಕಗಳನ್ನು ಓದುವ ಹವ್ಯಾಸ, ಅಭ್ಯಾಸ ಬೆಳೆಸಿಕೊಳ್ಳಬೇಕು.

- ವಿಧಾನಸೌಧದಲ್ಲಿ ಆಯೋಜಿಸಿದ್ದ ಪುಸ್ತಕ ಮೇಳ ಸಮಾರಂಭದಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಹೇಳಿದ್ದಾರೆ.

ಶಕ್ತಿಸೌಧದಲ್ಲಿ ಪುಸ್ತಕ ಮೇಳ

ಇನ್ನು ಶಾಸಕರ ಸ್ಥಳೀಯ ಪ್ರದೇಶಾಭಿವೃದ್ಧಿ ಯೋಜನೆಯಲ್ಲಿ ಪ್ರಸಕ್ತ ಸಾಲಿನ ಅನುದಾನದಲ್ಲಿ 2 ಲಕ್ಷ ರೂ. ಗಳ ಮಿತಿಯೊಳಗೆ ಶಾಸಕರು ಪುಸ್ತಕ ಖರೀದಿ ಮಾಡಲು ಅವಕಾಶ ನೀಡಲಾಗಿದೆ. ಶಾಸಕರು ಪುಸ್ತಕಗಳನ್ನು ಖರೀದಿಸಿ ಆಯಾ ಕ್ಷೇತ್ರ ವ್ಯಾಪ್ತಿಯ ಸರ್ಕಾರಿ ಶಾಲಾ-ಕಾಲೇಜುಗಳಿಗೆ ನೀಡಲು ಅವಕಾಶ ಕಲ್ಪಿಸಲಾಗಿದೆ.
150 ಮಳಿಗೆ ತೆರೆಯಲು ಮಾತ್ರ ಅವಕಾಶವಿದ್ದು, ವಿವಿಧ ಅಕಾಡೆಮಿಗಳ ಮಳಿಗೆಗಳು, ಖಾಸಗಿ ಮಳಿಗೆಗಳನ್ನು ತೆರೆಯಲು ಅವಕಾಶ ಕಲ್ಪಿಸಲಾಗಿದೆ. ಸಾರ್ವಜನಿಕರಿಗೆ ಉಚಿತ ಪ್ರವೇಶ ಇರಲಿದೆ. ಇನ್ನು, ಪುಸ್ತಕ ಮೇಳದ ಮೂಲಕ ಶಾಸಕಾಂಗವನ್ನು ಸಾಹಿತ್ಯ ಕ್ಷೇತ್ರದ ಹತ್ತಿರಕ್ಕೆ ತೆಗೆದುಕೊಂಡು ಹೋಗುವ ಹಾಗೂ ಪುಸ್ತಕ ಮೇಳದ ನೆಪದಲ್ಲಿ ಸಾರ್ವಜನಿಕರು, ಸಾಹಿತ್ಯಾಸಕ್ತರನ್ನು ವಿಧಾನಸೌಧಕ್ಕೆ ಹತ್ತಿರವಾಗಿಸುವ ಪ್ರಯತ್ನವನ್ನ ಯುಟಿ ಖಾದರ್ ಮಾಡಿದ್ದಾರೆ. ಅವರ ಈ ನಡೆಗೆ ಎಲ್ಲರೂ ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ.

ನಾಳೆ ದುಡ್ಡು ತಂದು ಪುಸ್ತಕ ಖರೀದಿಸುವೆ ಎಂದ ಸಿದ್ದರಾಮಯ್ಯ

ಪುಸ್ತಕ ಮೇಳಕ್ಕೆ ಚಾಲನೆ ಬಳಿಕ ಮಾತನಾಡಿದ ಸಿಎಂ ಸಿದ್ದರಾಮಯ್ಯ, ಅತ್ಯಂತ ಸಂತೋಷದಿಂದ‌ ಉದ್ಘಾಟನೆ ಮಾಡಿದ್ದೇನೆ. 150 ಪುಸ್ತಕ ಮಳಿಗೆಗಳು ಇವೆ. ಪುಸ್ತಕ ಪ್ರಿಯರಿಗೆ ಇದೊಂದು ಹಬ್ಬ. ಬೇರೆ ಭಾಷೆಯಿಂದ ಭಾಷಾಂತರ ಆಗಿರುವ ಪುಸ್ತಕ ಸಹ ಇಲ್ಲಿ ಸಿಗುತ್ತೆ. ದೇಶ ಸುತ್ತು, ಕೋಶ ಓದು ಅಂತ ಗಾದೆ ಇದೆ. ಜ್ಞಾನ ವಿಕಾಸ ಮಾಡಬೇಕು. ಓದುವಿಕೆಯಿಂದ ಜ್ಞಾನ ವಿಕಾಸ ಆಗುತ್ತದೆ. ಮಕ್ಕಳು ಓದುವ ಹವ್ಯಾಸ ಬೆಳೆಸಿಕೊಳ್ಳಬೇಕು ಎಂದು ಹೇಳಿದ್ದಾರೆ.

ನಾನು ಇಂದು ದುಡ್ಡು ತಂದಿಲ್ಲ. ನಾಳೆ ದುಡ್ಡು ತಂದು ಪುಸ್ತಕ ತೆಗೆದುಕೊಳ್ಳುತ್ತೇನೆ ಎಂದು ನಗೆ ಚಟಾಕಿ ಹಾರಿಸಿದರು. ನನಗೆ ಬೇಕಾದ ಪುಸ್ತಕ ಖರೀದಿ ಮಾಡುತ್ತೇನೆ. ಬೇರೆಯವರು ಖರೀದಿ ಮಾಡಿರೋ ಪುಸ್ತಕ ಓದಬಾರದು. ನೀವೇ ಖರೀದಿ ಮಾಡಿ ಪುಸ್ತಕ ಓದಬೇಕು ಎಂದಿದ್ದಾರೆ.

ಸ್ಪೀಕರ್ ಯು.ಟಿ ಖಾದರ್ ಹೇಳಿದ್ದಿಷ್ಟು 

ಸ್ಪೀಕರ್ ಯು.ಟಿ ಖಾದರ್ ಮಾತನಾಡಿ, ಪುಸ್ತಕ ಮೇಳ ಹಮ್ಮಿಕೊಳ್ಳುವ ಕನಸು ಕಂಡಿದ್ದೆವು. ಸಭಾಪತಿಗಳು ಎಲ್ಲಾ ಸಹಕಾರ ಕೊಟ್ಟಿದ್ದಾರೆ. ವಿಧಾನಸೌಧ ರಾಜಕಾರಣಿಗಳಿಗೆ ಮಾತ್ರವಲ್ಲ. ಎಲ್ಲರಿಗೂ ವಿಧಾನಸೌಧ ಎನ್ನುವ ಭಾವನೆ ಬರಲು ಅವಕಾಶ ಮಾಡಿಕೊಟ್ಟಿದ್ದೇವೆ. ಸಾಹಿತಿಗಳಿಗೆ ನಾವು ವಿಶೇಷ ಗೌರವ ಕೊಡ್ತಿದ್ದೇವೆ. ಸಾಹಿತಿಗಳು ಸತ್ಯವನ್ನ ಹೇಳುವವರು. ಸಾಹಿತಿಗಳಿಗೆ, ಬರಹಗಾರರಿಗೆ ನಾವು ಅವಕಾಶ ಮಾಡಿಕೊಟ್ಟಿದ್ದೇವೆ ಎಂದು ಹೇಳಿದ್ದಾರೆ
ಒಟ್ಟಿನಲ್ಲಿ ದೈನಂದಿನ ಜಂಜಾಟದಲ್ಲಿ ಮುಳುಗಿ ಹೋಗಿರುವ ನಾಗರಿಕರಲ್ಲಿ ಸಾಹಿತ್ಯದ ಅಭಿರುಚಿ ಮೂಡಿಸುವ ನಿಟ್ಟಿನಲ್ಲಿ ಈ ತೀರ್ಮಾನ ಸ್ವಾಗತಾರ್ಹ. ಶಕ್ತಿಸೌಧದ ಮಂದೆ ಸಾಹಿತ್ಯದ ತೇರನ್ನು ಎಳೆದು ಈ ಮೇಳವನ್ನು ಯಶಸ್ವಿಗೊಳಿಸಬೇಕಿದೆ.

ಮಹಾಶಿವರಾತ್ರಿಯ ಅರ್ಥ ಹಾಗೂ ಸಂಕೇತ

 ಮಹಾ ಶಿವರಾತ್ರಿಯು ಶಿವನಿಗೆ ಸಮರ್ಪಿತವಾದ ವಾರ್ಷಿಕ ಹಬ್ಬ ಅಥವಾ ಆಚರಣೆಯಾಗಿದೆ. ಇದನ್ನು ಮುಖ್ಯವಾಗಿ ಮಧ್ಯರಾತ್ರಿಯ ಸಮಯದಲ್ಲಿ ಆಚರಿಸಲಾಗುತ್ತದೆ. ಶಿವ್ಪುರಾಣ, ಸ್ಕಂಪುರಾಣ, ಲಿಂಪುರಾಣ ಮತ್ತು ಪದ್ಮಪುರಾಣಗಳು ಈ ದಿನದಂದು ಶಿವನು ಜಗತ್ತನ್ನು ರಕ್ಷಿಸಲು ನಕಾರಾತ್ಮಕತೆಯ ಸಂಕೇತವಾದ ವಿಷವನ್ನು ಹೇಗೆ ಸೇವಿಸಿದನು ಎಂಬುದರ ಬಗ್ಗೆ ಕಥೆಗಳನ್ನು ಹೇಳುತ್ತವೆ.

ವಿಷ ಸೇವನೆ ನಂತರ ಅವನು ಪ್ರಜ್ಞೆ ತಪ್ಪಿದನು ಮತ್ತು ಶಕ್ತಿ ತಾರಾಳ ರೂಪದಲ್ಲಿ ಎದೆಹಾಲು ಕುಡಿಸಲು ಮತ್ತು ಅವನನ್ನು  ಮರಳಿ ಜಾಗೃತಿಗೊಳಿಸಲು ಬಂದಳು. ನಂತರ, ಈ ಮಧ್ಯರಾತ್ರಿಯಲ್ಲಿ ಶಿವನ ಪುನರಾಗಮನವನ್ನು ಆಚರಿಸಲು ದೇವತೆಗಳು ಮತ್ತೊಮ್ಮೆ ಶಿವ ಮತ್ತು ಪಾರ್ವತಿಯ (ಶಕ್ತಿ) ವಿವಾಹವನ್ನು ನೆರವೇರಿಸಿದರು. ಈ ರಾತ್ರಿ ಶಿವ ಮತ್ತು ಶಕ್ತಿಯು ಅರ್ಧನಾರೀಶ್ವರರಾಗಿ ಒಗ್ಗೂಡುತ್ತಾರೆ ಮತ್ತು ಸೃಷ್ಟಿ, ಸಂರಕ್ಷಣೆ ಮತ್ತು ವಿನಾಶದ ಸ್ವರ್ಗೀಯ ನೃತ್ಯವನ್ನು ಪ್ರದರ್ಶಿಸುತ್ತಾರೆ. ಜೀವನ ಮತ್ತು ಜಗತ್ತಿನಲ್ಲಿನ ಕತ್ತಲೆ, ನಕಾರಾತ್ಮಕತೆ ಮತ್ತು ಅಜ್ಞಾನವನ್ನು ಜಯಿಸುವುದು ಈ ಹಬ್ಬದಾಚರಣೆಯ  ಮುಖ್ಯ ಮಹತ್ವವಾಗಿದೆ. ರಾತ್ರಿಯಿಡೀ ಎಚ್ಚರವಾಗಿರುವುದು, ಉಪವಾಸ ಮಾಡುವುದು, ಯೋಗ ಮಾಡುವುದು ಮತ್ತು ಆತ್ಮಸಂಯಮ, ಪ್ರಾಮಾಣಿಕತೆ, ಅಹಿಂಸೆ, ಕ್ಷಮೆ ಮುಂತಾದ ನೈತಿಕತೆ ಮತ್ತು ಸದ್ಗುಣಗಳ ಬಗ್ಗೆ ಧ್ಯಾನ ಮಾಡುವುದು, ನಮ್ಮೊಳಗೆ ಶಿವನನ್ನು ಕಂಡುಕೊಳ್ಳುವ ಮಾರ್ಗಗಳಾಗಿವೆ. ಕಾಶ್ಮೀರದ ಶೈವ ಪಂಥದಲ್ಲಿ, ಈ ಹಬ್ಬವನ್ನು ಹರ್-ರಾತ್ರಿ ಅಥವಾ ಧ್ವನಿಯಲ್ಲಿ ಸರಳವಾದ ಹೇರತ್ ಅಥವಾ ಹೆರಾತ್ ಎಂದು ಕರೆಯಲಾಗುತ್ತದೆ.

ಇದನ್ನೂ ಓದಿ: ಇಸ್ಲಾಮಿಕ್ ಪೂರ್ವ ದೇವತೆ ಹಬಲ್ ಎಂದರೆ ಮಹಾದೇವ ಶಿವ!!

ನಮ್ಮ ದೇಹದಲ್ಲಿ ಶಿವ ಮತ್ತು ಶಕ್ತಿ

ಭಗವಾನ್ ಶಿವನು ಒಂದು ಬ್ರಹ್ಮಾಂಡದ ರೂಪಕ, ಆದರೆ ಯೋಗಿ ಅಥವಾ ಭಿಕ್ಷುಕನಾಗಿದ್ದ ಮಾನವ ರೂಪ ಅವನದಲ್ಲ.ಮೆದುಳಿನ ಎರಡು ಅರ್ಧಗೋಳಗಳು ಯೋಗದ ಪರಿಭಾಷೆಯಲ್ಲಿವೆ, ನಾವು ಶಿವ ಮತ್ತು ಶಕ್ತಿ ಎಂದು ಕರೆಯುವ ಶಕ್ತಿಯ ರಚನೆಯಿಂದ ನಿಯಂತ್ರಿಸಲ್ಪಡುತ್ತವೆ.ಮೆದುಳಿನ ಎಡಭಾಗವು ತರ್ಕಬದ್ಧ ಮತ್ತು ತಾರ್ಕಿಕ ಚಿಂತನೆಯನ್ನು ನಿಯಂತ್ರಿಸುತ್ತದೆ. ಇದು ಅನುಮಾನಾತ್ಮಕ, ಯೋಜನೆ ಮತ್ತು ಊಹಾತ್ಮಕವಾಗಿದೆ. ಇವುಗಳು ಪುಲ್ಲಿಂಗ ಕಂಪನಗಳಾಗಿರಬೇಕು, ವಾಕ್ ಅರ್ಥದಲ್ಲಿ, ಲಿಂಗದ ಪಾತ್ರ ಇಲ್ಲಿಲ್ಲ .ಮೆದುಳಿನ ಬಲಭಾಗವು ಅಂತಃಪ್ರಜ್ಞೆ, ಸೃಜನಶೀಲತೆ, ಪ್ರವೃತ್ತಿ, ಭಾವನೆ, ಸಂತೋಷದ ಪ್ರಜ್ಞೆ, ಆಶ್ಚರ್ಯ ಮತ್ತು ಮಾನವ ಚೌಕಟ್ಟಿನ ಬಲಭಾಗವಾಗಿದೆ.ಇವು  ಸ್ತ್ರೀಲಿಂಗ ಕಂಪನಗಳಾಗಿವೆ.ವೈದಿಕ ಜ್ಯೋತಿಷ್ಯಶಾಸ್ತ್ರದಲ್ಲಿ, ಸೂರ್ಯನು ಬಲ ಕಣ್ಣನ್ನು ನಿಯಂತ್ರಿಸುತ್ತಾನೆ ಮತ್ತು ಚಂದ್ರನು ಎಡ ಕಣ್ಣನ್ನು ನಿಯಂತ್ರಿಸುತ್ತಾನೆ.ಚಂದ್ರನು ಭಾವನೆಯನ್ನು ನಿಯಂತ್ರಿಸುತ್ತಾನೆ ಮತ್ತು ಆದ್ದರಿಂದ ಶಕ್ತಿಯು ಅದನ್ನು ಮತ್ತು ಎಡ ಕಣ್ಣನ್ನು ನಿಯಂತ್ರಿಸುತ್ತದೆ. ಶಿವನು ತನ್ನ ಭಾವನೆಗಳ ಸಂಪೂರ್ಣ ಏಕಾಗ್ರತೆಯನ್ನು ಸಂಕೇತಿಸುವನು ಮತ್ತು ತನ್ನ ಪ್ರತಿಕ್ರಿಯೆಗಳು ಪ್ರಜ್ಞೆಯಿಂದ ಹೊರಬರುತ್ತವೆ, ಸಹಜ ಸ್ವಭಾವದಿಂದಲ್ಲ ಎಂದು ಒತ್ತಿಹೇಳಲು ತನ್ನ ತಲೆಯ (ಚಂದ್ರಶೇಖರ) ಮೇಲೆ ಚಂದ್ರನನ್ನು ಧರಿಸುತ್ತಾನೆ.

ಕುಂಡಲಿನಿ ಶಕ್ತಿ ಹರಿಯಲು ಎಡ ಮೂಗಿನ ಹೊಳ್ಳೆಯು ಇಡಾ ನಾಡಿ ಅಥವಾ ಚಂದ್ರನ ಕಾಲುವೆಗೆ ಸಂಪರ್ಕಿಸುತ್ತದೆ. ಇದು ತಂಪಾಗಿಸುವ, ಶಾಂತಗೊಳಿಸುವ, ಅಂತರ್ಬೋಧೆಯ ಮತ್ತು ಸೃಜನಶೀಲ ಚಲನೆಯಾಗಿದೆ., ಇದನ್ನು ಸಾಂಪ್ರದಾಯಿಕವಾಗಿ ಸ್ತ್ರೀಲಿಂಗ ಎಂದು ಕರೆಯಲಾಗುತ್ತದೆ. ಆದ್ದರಿಂದ ಇದನ್ನು ತಂಪಾದ ಅಲೆಗಳು ಅಥವಾ ನೀರು ಎಂದು ಚಿತ್ರಿಸಲಾಗಿದೆ, ಬಲ ಮೂಗಿನ ಹೊಳ್ಳೆಯು ಪಿಂಗಳ ನಾಡಿ ಅಥವಾ ಸೌರ ಕಾಲುವೆಗೆ ಸಂಪರ್ಕಿಸುತ್ತದೆ ಮತ್ತು ಉರಿಯುವ, ಶಕ್ತಿಯುತ, ಕ್ರಿಯೆ ಆಧಾರಿತ ಮತ್ತು ಪುಲ್ಲಿಂಗವಾಗಿದೆ. ಈ ಉಸಿರಾಟಗಳು ಬೆಂಕಿಯಂತೆ ಹರಿಯುತ್ತವೆ, ಕ್ರಿಯೆಗೆ ಶಾಖ ಮತ್ತು ಶಕ್ತಿಯನ್ನು ಉತ್ಪಾದಿಸುತ್ತವೆ.ಅದಕ್ಕಾಗಿಯೇ ದೇಹವನ್ನು ತಂಪಾಗಿಸಲು ಎಡ ಮೂಗಿನ ಹೊಳ್ಳೆಯ ಮೂಲಕ ಉಸಿರಾಡಲು ಯೋಗವು ನಮಗೆ ಸೂಚಿಸುತ್ತದೆ.ಹುಬ್ಬುಗಳ ಮಧ್ಯದಲ್ಲಿ ಇರುವ ನೇರ ಸರ್ಪವು ಸಂಪೂರ್ಣವಾಗಿ ಸಕ್ರಿಯವಾಗಿರುವ ಅಜ್ನಾ (ಅಜ್ನಾ) ಚಕ್ರವಾಗಿದೆ.ಇಲ್ಲಿ, ಇಡಾ ಮತ್ತು ಪಿಂಗಳಾ ಪರಸ್ಪರ ದಾಟಿ ಮಹಾ ಮರ್ಮ ಅಥವಾ ಅಧಿಕಾರದ ಆಧ್ಯಾತ್ಮಿಕ ಸಂಗಮವನ್ನು ರೂಪಿಸುತ್ತದೆ. .ಹಣೆಯ ಮೇಲೆ ತಲೆಕೆಳಗಾದ ತ್ರಿಕೋನವು ಆಧ್ಯಾತ್ಮಿಕ ಯೋನಿಯಾಗಿದೆ, ಇದು ಪೀಳಿಗೆಯ ಸೃಷ್ಟಿಯ ಲೆಕ್ಕಾಚಾರ ಆಗಿದೆ, ಇದು ಕೆಳ ಯೋನಿಯಿಂದ ಭಿನ್ನವಾಗಿದೆ, ಇದು ಸ್ವಾಧಿಷ್ಟ ಚಕ್ರದಿಂದ ನಿಯಂತ್ರಿಸಲ್ಪಡುತ್ತದೆ ಮತ್ತು ನಿಮ್ಮ ಕುಂಡಲಿನಿ ಈ ಹಂತಕ್ಕೆ ಏರಿದಾಗ ನೀವು ಜಗತ್ತಿಗೆ ಶಕ್ತಿಯ ಉಲ್ಬಣವನ್ನು ಅನುಭವಿಸುತ್ತೀರಿ ಮತ್ತು ನೀವು ಬಯಸದ್ದನ್ನು ಪಡೆಯುತ್ತೀರಿ.

ಇದನ್ನೂ ಓದಿ: ಶಿವನ ನಿವಾಸವೆನ್ನಲಾದ ಕೈಲಾಸ ಪರ್ವತದ ನಿಗೂಢಗಳು!!!

ಶಿವನು ಒಂದು ಬ್ರಹ್ಮಾಂಡದ ಶಕ್ತಿ. ಅವನು ದೇಹ ರೂಪದಲ್ಲಿರುವ ಮನುಷ್ಯನಲ್ಲ.ಅಗಾಧವಾದ, ಅನಂತ ದೈವತ್ವವನ್ನು ಸಂಕೇತಿಸಲು ಮತ್ತು ಯುವಜನರಿಗೆ, ಮಕ್ಕಳಿಗೆ ಮತ್ತು ಇತರರಿಗೆ ಅದನ್ನು ಗ್ರಹಿಸುವಂತೆ ಮಾಡಲು, ಅವರು ಒಂದು ರೂಪವನ್ನು ಕೊಟ್ಟರು. .ಶಿವನು ಒಂದು ತತ್ವ  ಎಲ್ಲಿಂದ ಎಲ್ಲವೂ ಬಂದಿದೆಯೋ, ಎಲ್ಲವೂ ಅದರಲ್ಲಿ ನೆಲೆಗೊಂಡಿದೆಯೋ ಅದೇ ತತ್ವ., ಮತ್ತು ಎಲ್ಲವೂ ಅದರಲ್ಲಿ ಲೀನವಾಗುತ್ತದೆ ಎಂದು ಇದು ಹೇಳುತ್ತದೆ. .ಶಿವನು ಬಾಹ್ಯಾಕಾಶ, ಅದು ಪ್ರಜ್ಞೆ. ಶಿವನು ಆತ್ಮ ಮತ್ತು ಶಕ್ತಿಯಿಲ್ಲದೆ, ಅದು ಶವ, ಶಿವನು ಆತ್ಮ ಮತ್ತು ಶಕ್ತಿಯು ದೇಹದಲ್ಲಿ ವಿಶ್ರಾಂತಿ ಪಡೆಯುವ ಕುಂಡಲಿನಿ. ಶಿವ-ಶಕ್ತಿಯ ಸಂಗಮವನ್ನು ಅವರ ಮದುವೆ ಎಂದು ವರ್ಣಿಸಲಾಗಿದೆ, ಇದು ವಾಸ್ತವವಾಗಿ ಮನಸ್ಸನ್ನು ಆತ್ಮದಲ್ಲಿ ಲೀನವಾಗಿಸುತ್ತದೆ, ಇದು ಧ್ಯಾನದಲ್ಲಿ ಆನಂದವನ್ನು ಸಾಧಿಸುವುದಕ್ಕೆ ಕಾರಣವಾಗುತ್ತದೆ. .ಇದನ್ನು ಸಾಧಿಸಲು, ಇಡೀ ದಿನ ಉಪವಾಸ ಮತ್ತು ರಾತ್ರಿಯಿಡೀ ಎಚ್ಚರವಾಗಿರಲು ಸೂಚಿಸಲಾಗುತ್ತದೆ.ಇದು ಯೋಗಿಯು ತನ್ನ ದೇಹದಲ್ಲೂ ಅನುಭವಿಸಬಹುದಾದ ಅರ್ಧನಾರೀಶ್ವರನ ವಿಶ್ವ ನೃತ್ಯವಾಗಿದೆ.

ಇದನ್ನೂ ಓದಿ: ಶಿವ ಮತ್ತು ರುದ್ರ ಬೇರೆ ಬೇರೆಯೇ? ಒಬ್ಬನೆ? ರುದ್ರನ ಹನ್ನೊಂದು ರೂಪದ ಬಗ್ಗೆ ಹೀಗೊಂದು ಚಿಕ್ಕ ಟಿಪ್ಪಣಿ

ಶತಕೋನವು ವೈದಿಕ ಸ್ವಾಸ್ತಿಕ ಚಿಹ್ನೆಯಷ್ಟೇ ಪುರಾತನವಾಗಿದೆ ಮತ್ತು ನಟರಾಜನಾಗಿ ಶಿವನ ತಾಂಡವ ನೃತ್ಯವನ್ನು ಸಹ ಪ್ರತಿನಿಧಿಸುತ್ತದೆ.

ಇದನ್ನೂ ಓದಿ: ಪ್ರಾಚೀನ ಭಾರತೀಯರಲ್ಲಿದ್ದ ಲೈಂಗಿಕತೆಯ ಕಲ್ಪನೆ ಹಾಗೂ ಶಿವ-ಶಕ್ತಿಯ ಸಮಾಗಮ!!

ದಕ್ಷಿಣ ಇಟಲಿಯ ಅಪುಲಿಯಾದ ಟ್ಯಾರಂಟೊದಲ್ಲಿರುವ ಯಹೂದಿಗಳ ಸಮಾಧಿಯ ಮೇಲೆ ಹೆಕ್ಸಾಗ್ರಾಮ್ ಚಿಹ್ನೆಯನ್ನು ಗುರುತಿಸಲಾಗಿದೆ, ಇದು ಸಾ. ಶ. ಮೂರನೇ ಶತಮಾನದಷ್ಟು ಹಿಂದಿನದು.1897 ರಲ್ಲಿ, ಈ ಶತಕೋನ ಚಿಹ್ನೆಯನ್ನು ಮೊದಲ ಝಿಯಾನಿಸ್ಟ್ ಕಾಂಗ್ರೆಸ್ ಅನ್ನು ಪ್ರತಿನಿಧಿಸಲು ಆಯ್ಕೆ ಮಾಡಲಾಯಿತು ಮತ್ತು ಈಗ ಇದು ಇಸ್ರೇಲ್ ಧ್ವಜದ ಒಂದು ಭಾಗವಾಗಿದೆ.ಯಹೂದಿ ಸ್ಟಾರ್ ಆಫ್ ಡೇವಿಡ್ ಸಂಕೇತವು ವೈದಿಕ ಅನಾಹತ (ಹೃದಯ) ಚಕ್ರವಾಗಿದೆ.ಸಮುದ್ರ ಮಂಥನದಲ್ಲಿ, ದೇವತೆಗಳು ನಮ್ಮ ದೇಹದಲ್ಲಿನ ಶಕ್ತಿಗಳು ಮತ್ತು ರಾಕ್ಷಸರು ಅಹಂಕಾರ, ಆಲಸ್ಯ ಮುಂತಾದ ಕೆಟ್ಟ ಗುಣಗಳ ಮಿಳಿತ ಸಾಧಿಸಿದ್ದರು. .ಉಪವಾಸ, ಧ್ಯಾನದಿಂದ ನಾವು ದೇಹದ ಒಳಿತು ಮತ್ತು ಕೆಡುಕಿನಿಂದ ಮೇಲೇರಬಹುದು. ಜಾಗರಣೆ ಅಥವಾ ಎಚ್ಚರವಾಗಿರುವುದು ಎಂದರೆ ವಾಸ್ತವವಾಗಿ ಧ್ಯಾನದಲ್ಲಿ ಆಧ್ಯಾತ್ಮಿಕವಾಗಿ ಎಚ್ಚರವಾಗಿರುವುದು ಎಂದರ್ಥ. ಅಂದರೆ ಜಾಗರಣೆಗೆ, ಒಬ್ಬರು ದೈಹಿಕವಾಗಿ ಎಚ್ಚರವಾಗಿರಬೇಕು ಮತ್ತು ಹೊಟ್ಟೆ ತುಂಬಿದ್ದಾಗ ಧ್ಯಾನ ಮಾಡಲು ಸಾಧ್ಯವಿಲ್ಲ. ಆದ್ದರಿಂದ, ಉಪವಾಸದಿಂದ ಕೂಡಿರಬೇಕು ಇತ್ಯಾದಿ ನಿಯಮಗಳನ್ನು ಮಾಡಲಾಗಿದೆ.

್ಉಪವಾಸ ಮತ್ತು ಜಾಗರಣೆಗಾಗಿ ಈ ರಾತ್ರಿಯನ್ನು ಮಾತ್ರ ಏಕೆ ಆಯ್ಕೆ ಮಾಡಲಾಗಿದೆ? ಇಂದು, ಸೂರ್ಯ ಮತ್ತು ಚಂದ್ರರು ಮಕರ ರಾಶಿಯಲ್ಲಿ ಪರಸ್ಪರ ಹತ್ತಿರವಾಗುತ್ತಾರೆ ಮತ್ತು ಚಂದ್ರನು ಮುಂದಿನ 2 ದಿನಗಳಲ್ಲಿ ಸೂರ್ಯನನ್ನು ದಾಟುತ್ತಾನೆ. ಮಕರ ರಾಶಿಯು ರಾಶಿಚಕ್ರದ ಕರ್ಮ ಸ್ಥಾನವಾಗಿದೆ (10 ನೇ ಮನೆ), ಇದು ಶನಿನಿಂದ ನಿಯಂತ್ರಿಸಲ್ಪಡುತ್ತದೆ ಮತ್ತು ಆಧ್ಯಾತ್ಮಿಕ ಅಭ್ಯಾಸಗಳಿಗೆ ಸೂಕ್ತವಾಗಿದೆ. ಆದ್ದರಿಂದ, ಶಿವ ತತ್ತ್ವ ಮತ್ತು ಶಕ್ತಿ ತತ್ತ್ವವು ಒಗ್ಗೂಡಿದಾಗ ಇದು. ರಾತ್ರಿಯಿಡೀ ಎಚ್ಚರವಾಗಿರುವ ಶಿವರಾತ್ರಿಯ ಜಾಗರಣೆ ಎಂದರೆ ಭಕ್ತಿಗೀತೆಗಳನ್ನು ಹಾಡುವುದು,  ಚಲನಚಿತ್ರಗಳನ್ನು ನೋಡುವುದು ಅಥವಾ ಗಾಸಿಪ್ ಮಾಡುವ ಮೂಲಕ ಎಚ್ಚರವಾಗಿರಲು ಹೇಳುವುದು ಮಾತ್ರವಲ್ಲ. ನಿದ್ರೆಯು ಪ್ರತಿದಿನವೂ ತರುವ ಆಂತರಿಕ ವಿಶ್ರಾಂತಿಯ ಬಗ್ಗೆ ಪ್ರಜ್ಞಾಪೂರ್ವಕವಾಗಿ ತಿಳಿಸುವುದು ಸಹ ಹೌದು.  ನೀವು ನಿದ್ರೆಯ ಒಂದು ನಿರ್ದಿಷ್ಟ ಪದರವನ್ನು ದಾಟಿದಾಗ, ಸಮಾಧಿ ಸ್ಥಿತಿ ತಲುಪುವುದು. ಸಮಾಧಿ ಎಂದರೆ ಶಿವ ಸಯುಜ್ಯ, ಶಿವನ ಉಪಸ್ಥಿತಿ, ಜಾಗರೂಕತೆಯೊಂದಿಗೆ ಆಳವಾದ ವಿಶ್ರಾಂತಿಯ ಸ್ಥಿತಿ, ಇದು ಎಲ್ಲಾ ಗುರುತುಗಳಿಂದ ಬಿಡುಗಡೆಯನ್ನು ತರುತ್ತದೆ.

ಶಿವಲಿಂಗವು ಕೇವಲ ಒಂದು ಕಲ್ಲು ಮಾತ್ರವಲ್ಲ, ಸೃಷ್ಟಿಯ ಸಂಕೇತವಾಗಿದೆ. ಶಿವನನ್ನು ಸೈನ್ ಅಲೆಗಳ ಆಕಾರದಲ್ಲಿ ಚಲಿಸುವ ಎಲೆಕ್ಟ್ರಾನುಗಳ ರೂಪದಲ್ಲಿ ಪೂರ್ವ-ಪರಮಾಣು ಹಂತವೆಂದು (ಅನುಪೂರ್ವಾ ಸ್ಥಿತಿ) ್ವಿವರಿಸಲಾಗಿದೆ. ಶಿವಲಿಂಗದ 3 ಭಾಗಗಳ ವೈಜ್ಞಾನಿಕ ಅರ್ಥ ಮತ್ತು ಮಹತ್ವವೇ ಇದು.

ಇದನ್ನೂ ಓದಿ: "ಶಿವನ ಮೂರನೇ ಕಣ್ಣು" ಮತ್ತು ಅದಕ್ಕೆ ಸಂಬಂಧಿಸಿದ ವಿವಿಧ ಕಥೆಗಳ ಹಿಂದಿನ ಸಾಂಕೇತಿಕತೆಯ ಅರ್ಥ!!

ಮಹಾ ಮೃತ್ಯುಂಜಯ ಮಂತ್ರ

ॐ त्र्यं॑बकं यजामहे सु॒गन्धिं॑ पुष्टि॒वर्ध॑नम् ।

उ॒र्वा॒रु॒कमि॑व॒ बन्ध॑नान् मृ॒त्योर् मु॑क्षीय॒ माऽमृता॑त् ।

ಓ ಮೃತ್ಯುಂಜಯನೇ, ಬಳ್ಳಿಯಿಂದ ತಾನಾಗಿ ಕಳಚಿಕೊಳ್ಳುವ ಹಣ್ಣಿನಂತೆ ನಾನು ನಶ್ವರವಾದ ಸಂಸಾರದಿಂದ ಕಳಚಿಕೊಳ್ಳುವಂತೆ ನನ್ನಲ್ಲಿ ಪುಷ್ಟಿಯನ್ನು ತಂದು ನಾನು ಪಕ್ವವಾಗುವಂತೆ ಮಾಡು.

ಸ್ಥಿರವಾದುದು, ಶಾಶ್ವತವಾದುದು, ಅನಂತವಾದುದರ ಕಡೆಗೆ ಹೋಗುವ ನನ್ನ ಯತ್ನದಿಂದ ನನ್ನನ್ನು ಬಿಡಿಸಬೇಡ.

ಏಷ್ಯಾದ ಅತಿದೊಡ್ಡ ವೈಮಾನಿಕ ಮತ್ತು ರಕ್ಷಣಾ ಪ್ರದರ್ಶ ಏರೋ ಇಂಡಿಯಾಗೆ ರಾಜನಾಥ್ ಸಿಂಗ್ ಚಾಲನೆ

 ಏಷ್ಯಾದ ಅತಿದೊಡ್ಡ ವೈಮಾನಿಕ ಮತ್ತು ರಕ್ಷಣಾ ಪ್ರದರ್ಶನ ಏರೋ ಇಂಡಿಯಾದ 15 ನೇ ಆವೃತ್ತಿಯನ್ನು 2025ರ ಫೆಬ್ರವರಿ 10 ರಂದು ಕರ್ನಾಟಕದ ಬೆಂಗಳೂರಿನಲ್ಲಿರುವ ಯಲಹಂಕ ವಾಯು ನಿಲ್ದಾಣದಲ್ಲಿ ಕೇಂದ್ರ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಸೋಮವಾರ ಉದ್ಘಾಟಿಸಿದರು.ಯಲಹಂಕ ವಾಯುಪಡೆ ನೆಲೆಯಲ್ಲಿ ಇಂದಿನಿಂದ 5 ದಿನಗಳ ಕಾಲ ಏರೋ ಇಂಡಿಯಾ ಶೋ ಆರಂಭವಗಿದ್ದು, ಉದ್ಘಾಟನಾ ಕಾರ್ಯಕ್ರಮದಲ್ಲಿ ವಿಮಾನಗಳ ಆಕರ್ಷಕ ಕಸರತ್ತು ಎಲ್ಲರನ್ನು ರಂಜಿಸಿತು.

ಆಕಾಶಗಂಗೆ ತಂಡದಿಂದ ಪ್ಯಾರಾಚೂಟ್ ಗಳಿಂದ ಸೈನಿಕರು ವಾಯುನೆಲೆಯ ರನ್ ವೇ ಬಳಿ ತ್ರಿವರ್ಣ ಧ್ವಜ ಹೊತ್ತು ಇಳಿದರು. ತೇಜಸ್ ಯುದ್ಧವಿಮಾನ ಫಾರ್ಮೇಶನ್, ಸುಖೋಯ್ ಎಂಕೆ35 ಆಗಸದಲ್ಲಿ ತ್ರಿಶೂಲ್ ವಿನ್ಯಾಸ ಮೂಡಿಸಿತು, ದ್ರೋಣಿಯರ್, ಜಾಗ್ವಾರ್ ಯುದ್ಧ ವಿಮಾನ, ಹಗು ಯುದ್ಧ ಹೆಲಿಕಾಪ್ಟರ್, ಜಾಗ್ವಾರ್ ಫಾರ್ಮೇಶನ್, ಎಂಬ್ರಿಯರ್ ಸಂವಹನ ವಿಮಾನ ಸೇರಿದಂತೆ ಹಲವು ವಿಮಾನ, ಹೆಲಿಕಾಪ್ಟರ್ ಗಳು ನೀಲಿ ಆಗಸದಲ್ಲಿ ಪ್ರದರ್ಶನ ತೋರಿದವು.

ಏರ್‌ ಶೋಗೆ ಚಾಲನೆ ನೀಡಿದ ಬಳಿಕ ಕಾರ್ಯಕ್ರಮ ಉದ್ದೇಶಿಸಿ ರಾಜನಾಥ್‌ ಸಿಂಗ್‌ ಮಾತನಾಡಿದರು. ಏರ್‌ ಶೋ ಮೂಲಕ ಮತ್ತೊಂದು ಕುಂಭ ಶುರುವಾದಂತಿದೆ. ಪ್ರಯಾಗ್‌ರಾಜ್‌ನ ಮಹಾ ಕುಂಭ ಮೇಳ ಸಂಸ್ಕೃತಿ ಬಗ್ಗೆ ತೋರಿಸಿದ್ರೆ, ಏರ್‌ ಶೋ ಭಾರತದ ರಕ್ಷಣಾ ಬಲಿಷ್ಠತೆಯನ್ನ ಜಗತ್ತಿಗೆ ಸಾರುತ್ತಿದೆ. ಅಲ್ಲದೇ ಅಭಿವೃದ್ಧಿ, ಉತ್ಪಾದನೆಯ ಬಗ್ಗೆ ಭಾರತ ಕೇಂದ್ರೀಕೃತವಾಗಿದೆ. ಏರ್ ಶೋ ರಾಷ್ಟ್ರ-ರಾಷ್ಟ್ರಗಳ ಮಧ್ಯೆ ಸಂಬಂಧ – ಬಾಂಧವ್ಯಗಳನ್ನ ಅಭಿವೃದ್ಧಿಗೊಳಿಸುತ್ತದೆ ಎಂದು ನುಡಿದರು.

ದೇಶ-ವಿದೇಶಗಳ ವಾಯುಪಡೆಯ ಅಧಿಕಾರಿಗಳು ಇಲ್ಲಿದ್ದಾರೆ. ಭಾರತದ ಜೊತೆ ಈ ಅಧಿಕಾರಿಗಳ ಸಹಭಾಗಿತ್ವ ಮುಖ್ಯವಾಗಿದೆ. ಈ ಸಂಬಂಧ ವೃದ್ಧಿಯಾದ್ರೆ ಜಗತ್ತಿನಲ್ಲಿ ಬಲಿಷ್ಠರಾಗುತ್ತೇವೆ. ಡಿಜಿಟಲ್, ಸ್ಟಾರ್ಟ್ ಆಪ್, ಕೈಗಾರಿಕೋದ್ಯಮ, ನವೋಧ್ಯಮದಲ್ಲಿ ಭಾರತ ಪ್ರಗತಿ ಹೊಂದುತ್ತಿದೆ. ಅದರಂತೆ ರಕ್ಷಣಾ ವಲಯ ಬಲಿಷ್ಠವಾಗುತ್ತಿದೆ ಎಂದು ಶ್ಲಾಘಿಸಿದರು.ಇದೇ ವೇಳೆ ಬೆಂಗಳೂರಿನ ಹೆಚ್‌ಎಎಲ್‌ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ ರಾಜನಾಥ್‌ ಸಿಂಗ್‌, ಗುಜರಾತ್ ನಲ್ಲಿ ರಕ್ಷಣಾ ವ್ಯವಸ್ಥೆಗೆ ಸಂಬಂಧಿಸಿದ ಉತ್ಪಾದನಾ ಘಟಕ ಆರಂಭವಾಗಿದೆ. ಬೆಂಗಳೂರನ್ನ ಸಿಲಿಕಾನ್ ವ್ಯಾಲಿ ಎನ್ನಬಹುದು. ಯುದ್ಧ ವಿಮಾನಗಳು, ಡ್ರೋನ್ಸ್, ರಡಾರ್ ಸೇರಿ ರಕ್ಷಣಾ ಉತ್ಪಾದನೆಯಲ್ಲಿ ಭಾರತ ಪ್ರಗತಿ ಸಾಧಿಸುತ್ತಿದೆ. 400ಕ್ಕೂ ಹೆಚ್ಚು ದೇಶಿಯ ರಕ್ಷಣಾ ವ್ಯವಸ್ಥೆಗೆ ಸಂಬಂಧಪಟ್ಟ ಖಾಸಗಿ ಕಂಪನಿಗಳು ಪ್ರದರ್ಶಕರು ಭಾಗಿಯಾಗಿದ್ದಾರೆ. ಮುಂದಿನ 2 ವರ್ಷಗಳಲ್ಲಿ ಮತ್ತಷ್ಟು ಅಭಿವೃದ್ಧಿ ಸಾಧಿಸಲಿದ್ದೇವೆ. ಡಿಫೆನ್ಸ್ ರಪ್ತು 21,000 ಕೋಟಿಗೂ ಹೆಚ್ಚಾಗಿದೆ. ಅಲ್ಲದೇ ಮುಂದುವರೆದ ರಾಷ್ಟ್ರಗಳಲ್ಲಿ ರಕ್ಷಣಾ ಉತ್ಪನ್ನಗಳ ಪಾಲುದಾರಿಕೆಯಲ್ಲಿ ಭಾರತ ಭಾಗಿಯಾಗಿದೆ ಎಂದು ಶ್ಲಾಘಿಸಿದ್ರು.