ಹಲವು ಪ್ರಥಮಗಳ ಮಹಿಳೆ ಶಾಂತಾ ರಂಗಸ್ವಾಮಿ

“ನಾವು ಭಾರತದಲ್ಲಿ ಮಹಿಳಾ ಕ್ರಿಕೆಟ್ ಗೆ ಭದ್ರ ಬುಮಾದಿ ಹಾಕಿಕೊಟ್ಟೆವು. ಭಾರತ ಮಹಿಳಾ ಕ್ರಿಕೆಟ್ಟಿನ ಸ್ಥಾಪಕ ತಂಡದ ಸದಸ್ಯರು ಎನ್ನುವ ಹೆಮ್ಮೆ ನನಗಿದೆ. ಈಗ ಜೀವಮಾನ ಸಾಧನೆ ಪುರಸ್ಕಾರ ಲಭಿಸಿರುವುದು ಸಹ ಮಹಿಳಾ ಕ್ರಿಕೆಟ್ಟಿಗೆ ಸಿಕ್ಕ ಗೌರವವಾಗಿದೆ. ಇಷ್ಟು ತಡವಾಗಿಯಾದರೂ ಬಿಸಿಸಿಐ ಮಹಿಳಾ ಕ್ರಿಕೆಟಿಗರನ್ನು ಜೀವಮಾನ ಸಾಧನೆ ಗೌರವಕ್ಕೆ ಪರಿಗಣಿಸಿತಲ್ಲ ಎನ್ನುವುದೇ ಸಂತಸದ ವಿಚಾರ. ಅದು ನನ್ನಿಂದಲೇ ಪ್ರಾರಂಭವಾದದ್ದು ಇನ್ನೂ ಖುಷಿ.”  ಇದು ಇತ್ತೀಚೆಗೆ ಭಾರತೀಯ ಕ್ರಿಕೆಟ್ ನಿಯಂತ್ರಣಾ ಮಂಡಳಿ (ಬಿಸಿಸಿಐ) ನಿಂದ ಜೀವಮಾನ ಸಾಧನೆ ಪುರಸ್ಕಾರಕ್ಕೆ ಭಾಜನರಾದ ಕರ್ನಾಟಕದ ಹೆಮ್ಮೆಯೆ ಮಹಿಳಾ ಕ್ರಿಕೆಟ್ ಆಟಗಾರ್ತಿ ಶಾಂತಾ ರಂಗಸ್ವಾಮಿಯವರ ಮನದ ಮಾತುಗಳು.

ಸಿ.ವಿ. ರಂಗಸ್ವಾಮಿ ಹಾಗೂ ರಾಜಲಕ್ಷ್ಮಿಯವರ ಮಗಳಾದ ಶಾಂತಾ ಹುಟ್ಟಿದ್ದು ಚೆನ್ನೈನಲ್ಲಿ ಆದರೂ ಬೆಳೆದದ್ದೆಲ್ಲಾ ಬೆಂಗಳೂರಿನಲ್ಲಿ. ಕ್ರಿಕೆಟಿಗರಾದ ಮೇಲೆಯೂ ಆಡಿದ್ದು ಕರ್ನಾಟಕ ರಾಜ್ಯ ಕ್ರಿಕೆಟ್ ಅಸೋಸಿಯೇಷನ್ ಗೆ ಮಾತ್ರ. ಹೀಗಾಗಿ ಇವರು ಅಪ್ಪಟ ಕನ್ನಡಿಗರೇ ಎನ್ನುವುದು ನಿರ್ವಿವಾದ. ಏಳು ಜನ ಸಹೋದರಿಯರಲ್ಲಿ ಶಾಂತಾ ಮೂರನೇಯವರಾಗಿದ್ದು ಪದವಿ ವ್ಯಾಸಂಗ ಮಾಡಿ ಮುಗಿಸುವ ವೇಳೆಗೆ ಕೆನರಾ ಬ್ಯಾಂಕಿನಲ್ಲಿ ನೌಕರಿ ದೊರಕಿತ್ತು. ಮುಂದೆ ಅದರಲ್ಲಿಯೇ ಜನರಲ್ ಮ್ಯಾನೆಜರ್ ಹುದ್ದೆಗೇರಿ ನಿವೃತ್ತರಾದರು.

ಕೂಡು ಕುಟುಂಬದ ಹಿನ್ನೆಲೆಯಿಂದ ಬಂದ ಶಾಂತಾ ಅವರ ಮನೆಯಲ್ಲಿಯೇ ಇಪ್ಪತ್ತು ಮಕ್ಕಳಿದ್ದರು.ದರಲ್ಲಿಯೂ ಹುಡುಗಿಯರೇ ಹೆಚ್ಚು! ಮಹಿಳಾ ಸೇವಾ ಸಮಆಜದಲ್ಲಿ ಎಲ್ಲರೂ ಕೂಡಿ ಕ್ರಿಕೆಟ್ ಆಡುತ್ತಾ ಬಾಲ್ಯ ಕಳೆದಿದ್ದ ಶಾಂತಾ ಅವರಿಗೆ ಬಾಲ್ಯದಲ್ಲಿಯೇ ಕ್ರಿಕೆಟ್ ಕುರಿತಂತೆ ತೀವ್ರ ಆಸಕ್ತಿ ಮೂಡಿತ್ತು. ಶಾಲೆ, ಕಾಲೇಜು ದಿನಗಳಿಂದಲೂ ಕ್ರಿಕೆಟ್ ಆಡುತ್ತಿದ್ದ ಶಾಂತಾ ಕರ್ನಾಟಕ ರಾಜ್ಯ ಮಹಿಳಾ ಕ್ರಿಕೆಟ್ ತಂಡದ ನಾಯಕಿಯಾಗಿ ಆಯ್ಕೆಯಾದರು. ಆಗೆಲ್ಲಾ ಮಹಿಳಾ ಕ್ರಿಕೆಟಿಗರಿಗೆ ಈಗಿನಂತೆ ಸೂಕ್ತ ಅನುಕೂಲಗಳಿರಲಿಲ್ಲ ಎಂದು ನೆನಪಿಸಿಕೊಳ್ಳುವ ಶಾಂತಾ ಅವರು “ನಾನು ಕೆ.ಆರ್. ರಸ್ತೆಯಲ್ಲಿದ್ದ ನನ್ನ ಮನೆಯಿಂದ ಸೆಂಟ್ರಲ್ ಕಾಲೇಜು ಮೈದಾನಕ್ಕೆ ನಡೆದುಕೊಂಡು ಹೋಗಿ ಅಭ್ಯಾಸ ನಡೆಸುತ್ತಿದ್ದೆ. ಕಂಠೀರವ ಸ್ಟೇಡಿಯಂ, ನ್ಯಾಷನಲ್ ಹೈಸ್ಕೂಲು ಮೈದಾನದಲ್ಲಿಯೂ ನಾವು ಕ್ರಿಕೆಟ್ ಪ್ರಾಕ್ಟೀಸ್ ಮಾಡುತ್ತಿದ್ದೆವು.” ಎನ್ನುತ್ತಾರೆ.

ಇದಕ್ಕೂ ಮುನ್ನ ಶಾಂತಾ ಬಾಲ್ ಬಾಡ್ಮಿಂಟನ್ ಕ್ರೀಡೆಯಲ್ಲಿಯೂ ತಮ್ಮನ್ನು ತೊಡಗಿಸಿಕೊಂಡಿದ್ದರು. ಅವರು ತಮ್ಮ ಕಾಲೇಜು ದಿನಗಳಲ್ಲಿ ಸಾಫ್ಟ್ ಬಾಲ್ ಕ್ರೀಡಾ ತಂಡದ ನಾಯಕಿಯೂ ಆಗಿದ್ದರು ಎನ್ನುವುದು ಗಮನಾರ್ಹ. ಆ ನಂತರ ಕ್ರಿಕೆಟ್ ತಂಡದಲ್ಲಿ ಅವಕಾಶ ಗಿಟ್ಟಿಸಿಕೊಂಡುದಲ್ಲದೆ 1976 ರಲ್ಲಿ  ಪ್ರಥಮ ಮಹಿಳಾ ಕ್ರಿಕೆಟ್ ರಾಷ್ಟ್ರೀಯ ತಂಡದ ನಾಯಕಿಯಾಗಿಯೂ ಆಯ್ಕೆಯಾದರು.

ಮುಂದಿನದೆಲ್ಲವೂ ಇತಿಹಾಸ.  ಭಾರತೀಯ ಮಹಿಳಾ ಕ್ರಿಕೆಟ್ ತಂಡದಲ್ಲಿ ವಿದೇಶೀ ನೆಲದಲ್ಲಿ ಶತಕ ಬಾರಿಸಿದ ಮೊದಲ ಮಹಿಳೆ, ಹಾಗೆಯೇ ಟೆಸ್ಟ್ ಪಂದ್ಯ ಗೆದ್ದ ಪ್ರಥಮ ನಾಯಕಿ ಸಹ ಇವರಾಗಿದ್ದಾರೆ. ಬಲಗೈ ಬ್ಯಾಟ್ಸ್ ಮನ್ ಮತ್ತು ಆಲ್ ರೌಂಡರ್  ಆಗಿದ್ದ ಶಾಂತಾ ಅವರು ಒಟ್ಟು 16 ಟೆಸ್ಟ್ ಹಾಗೂ 19 ಏಕದಿನ ಪಂದ್ಯಗಳನ್ನು ಅಂತರಾಷ್ಟ್ರೀಯ ಮಟ್ಟದಲ್ಲಿ ಆಡಿದ್ದು ಟೆಸ್ಟ್ ನಲ್ಲಿ 750 ಮತ್ತು ಏಕದಿನ ಪಂದ್ಯದಲ್ಲಿ 287 ರನ್ನುಗಳನ್ನು ಗಳಿಸಿದ್ದಾರೆ 8-1-1977 ರಲ್ಲಿ ನ್ಯೂ ಝಿಲ್ಯಾಂಡಿನ ಡ್ಯುನೆಡಿನ್ ನಲ್ಲಿ ನಡೆದ ನ್ಯೂ ಝಿಲ್ಯಾಂಡಿನ ವಿರುದ್ದ ಟೆಸ್ಟ್ ಪಂದ್ಯದಲ್ಲಿ 108 ರನ್ ಗಳಿಸಿ ಈ ಸಾಧನೆ ಮಾಡಿದ ಪ್ರಥಮ ಭಾರತೀಯ ಮಹಿಳೆ ಎನಿಸಿದ್ರು. 1976 ರಲ್ಲಿ ಪುಣೆಯಲ್ಲಿ ನಡೆದ ವೆಸ್ಟ್ ಇಂಡೀಸ್ ವಿರುದ್ದ ಪಂದ್ಯದಲ್ಲಿ ಮ್ಯಾಚ್  ಆಫ್ ದಿ ವುಮನ್ ಗೌರವಕ್ಕೆ ಪಾತ್ರರಾಗಿದ್ದರು.

ಏಕದಿನ ಮಹಿಳಾ ವಿಶ್ವಕಪ್ ಸರಣಿಯು ರಲ್ಲಿ ನ್ಯೂ ಝಿಲ್ಯಾಂಡಿನಲ್ಲಿ ನಡೆದಿದ್ದ ಸಮಯದಲ್ಲಿ ಶಾಂತಾ ತಮ್ಮ ಕ್ರೀಡಾ ಬದುಕಿನ ಅತ್ಯಂತ ಶ್ರೇಷ್ಠ ಬ್ಯಾಂಟಿಂಗ್ ಹಾಗೂ ಬೌಲಿಂಗ್ ಪ್ರದರ್ಶನ ನೀಡಿದ್ದರು. ಇನ್ನೊಮ್ಮೆ ಆಕೆ ದಕ್ಷಿಣ ವಲಯ ಪರವಾಗಿ ಕ್ರಿಕೆಟ್ ಆಡುತ್ತಿದ್ದಾಗ ತಮ್ಮ ಬೆರಳಿನ ಮೂಳೆ ಮುರಿತಕ್ಕೆ ಒಳಗಾಗಿದ್ದರೂ ಆಟವಾಡಿ ತಂಡದ ಆತ್ಮವಿಶ್ವಾಸ ಹೆಚ್ಚಿಸಿದ್ದರು.

ಎಪ್ಪತ್ತರ ದಶಕದಲ್ಲಿ ಮಹಿಳೆಯರು ಕ್ರಿಕೆಟ್ ಆಡುವುದು ಎಂದರೆದು ಸಾಧಾರಣ ವಿಚಾರವಾಗಿರಲಿಲ್ಲ. ಜನರು ಅಚ್ಚರಿಯಿಂದ ಕಾಣುತ್ತಿದ್ದರು. ಅಲ್ಲದೆ 'ಇವರೆಂತಹಾ ಗಂಡುಬೀರಿಗಳು' ಎಂದು ಮೂಗು ಮುರಿಯುತ್ತಿದ್ದರು. ಇಂತಹಾ ಸನ್ನಿವೇಶದಲ್ಲಿ 'ಶಾಂತಾ ಇದ್ದರೇ ಗೆಲುವು' ಎನ್ನುವಂತೆ ಆಡಿದ್ದ ಶಾಂತಾ ರಂಗಸ್ವಾಮಿ ಕ್ರಿಕೆಟ್ ಗೆ ನೀಡಿದ ಕಾಣಿಕೆ ಅದು ಬೆಲೆ ಕಟ್ಟಲಾರದ್ದು. ತೊಂಭತ್ತರ ದಶಕದಲ್ಲಂತೂ ಕ್ರಿಕೆಟ್ ನಲ್ಲಿ ಹೆಸರುವಾಸಿಯಾಗಿದ್ದ ಈಕೆ ಮಹಿಳಾ ಕ್ರಿಕೆಟ್ ಎಂದಾಕ್ಷಣ ಶಾಂತಾ ಎನ್ನುವಷ್ಟರ ಮಟ್ಟಿಗೆ ಪ್ರಸಿದ್ದಿಗೆ ಬಂದಿದ್ದರು. ‘1976 ನನ್ನ ಪಾಲಿನ ಸುವರ್ಣ ವರ್ಷ ಎನ್ನುವ ಶಾಂತಾ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ವೆಸ್ಟ್‌ ಇಂಡೀಸ್‌ ವಿರುದ್ಧ ಸೆಂಚುರಿ ಬಾರಿಸ್ದೆ. ಟಿಕೆಟ್‌ ಇತ್ತು. 35 ಸಾವಿರ ಜನ ಸೇರಿದ್ರು’ ಎಂದು ನೆನೆಸಿಕೊಳ್ಳುತ್ತಾರೆ.

ತಮ್ಮ ಕ್ರೀಡಾ ಜೀವನದ ನೆನಪುಗಳು ಮತ್ತು ಇಂದಿನ ಭಾರತೀಯ ಮಹಿಳಾ ಕ್ರಿಕೆಟಿನ ಕುರಿತಂತೆ ಮಾತನಾಡುವ ಶಾಂತಾ ರಂಗಸ್ವಾಮಿ ‘ನನಗಿಂದಿಗೂ ನೋವು ಉಂಟು ಮಾಡುವ ಸಂಗತಿ ಎಂದರೆ ಕರ್ನಾಟಕಕ್ಕೆ ನ್ಯಾಷನಲ್ ಚಾಂಪಿಯನ್ ಶಿಪ್ ಗೆಲ್ಲಿಸಿ ಕೊಡಲು ನನ್ನಿಂದ ಸಾಧ್ಯವಾಗಿಲ್ಲ. ವಾರಣಾಸಿಯಲ್ಲಿ ನಡೆದ ಪಂದ್ಯದಲ್ಲಿ ನಾನು ಎಪ್ಪತ್ತಾರು ರನ್ ಗೆ ಔಟಾದೆ. ಇನ್ನೂ ಇಪ್ಪತ್ತು ರನ್ ಬಂದಿದ್ದಲ್ಲಿ ನಾವೇ ಜಯ ಗಳಿಸುತ್ತಿದ್ದೆವು. ಈ ಸೋಲು ನನ್ನನ್ನು ಇಂದಿಗೂ ಕಾಡುತ್ತಿದೆ.

ಇಂದು ಮಹಿಳಾ ಕ್ರಿಕೆಟ್ ಬಹಳಷ್ಟು ಸುಧಾರಿಸಿದೆ. ಆದರೂ ಇಂದಿಗೂ ನಾಯಕಿಯನ್ನು ಅವಲಂಬಿಸುವ ಅನಿವಾರ್ಯತೆ ಇನ್ನೂ ಉಳಿದಿದೆ. ಪುರುಷರ ಕ್ರಿಕೆಟಿನಲ್ಲಿರುವಂತೆ ತಂಡದ ಸದಸ್ಯರು ತಮ್ಮ ಸ್ವಂತ ಪ್ರದರ್ಶನದಿಂದ ಗುರುತಿಸಿಕೊಳ್ಳುವಷ್ಟು ಇನ್ನೂ ಬೆಳೆದಿಲ್ಲ. ಅ<ದು ನನ್ನನ್ನೇ ಅವಲಂಬಿಸಿದ್ದು ಇವತ್ತೂ ಸಹ ಮಿಥಾಲಿಯನ್ನೇ ನೆಚ್ಚಿಕೊಂಡಿರುವುದನ್ನು ಕಾಣುತ್ತೇವೆ, ಈ ನಿಟ್ಟಿನಲ್ಲಿ ಮಹಿಳಾಕ್ರಿಕೆಟ್ ಇನ್ನಷ್ಟು ಸುಧಾರಣೆ ಹೊಂದಬೇಕಿದೆ.

 ಪುರುಷ ಕ್ರಿಕೆಟಿನಂತೆ ಮಹಿಳಾ ಕ್ರಿಕೆಟರ್ ಗಳಿಗೂ ಐಪಿ ಎಲ್ ನಂತಹಾ ಪಂದ್ಯವಾಡಲು ಅವಕಾಶ ಸಿಕ್ಕರೆ ಉತ್ತಮ. ಹತ್ತು ತಂಡಗಳಲ್ಲಿ ನೂರು ಜನ ಆಡಿದಾಗ ಅದರಲ್ಲಿ ಹನ್ನೊಂದು ಮಂದಿಯಾದರೂ ನಮ್ಮವರಿದ್ದರೆ ಒಳ್ಳೆಯದಲ್ಲವೆ? ಇನ್ನು ಆರ್ಥಿಕ ಸ್ವಾವಲಂಬನೆಗೂ ಇದು ಸಹಾಯವಾಗಬಲ್ಲದು ಎನ್ನುವುದು ಸಹ ನಿಜ ಸಂಗತಿ. ಎನ್ನುತ್ತಾರೆ.

ತಂಡದ ನಾಯಕಿಯಾಗಿ ಆಟವಾಡಿದ ಕುರಿತು ವಿವರಿಸುವ ಶಾಂತಾ ನಾನು ಆಡಿದ ಬಹುತೇಕ ಪಂದ್ಯಗಳಲ್ಲಿ ತಂದದ ನಾಯಕತ್ವ ನನ್ನ ಪಾಲಿಗೆ ಬಂದದ್ದೊಂದು ಒಳ್ಳೆಯ ಸಂಗತಿ. ಇಡಿ  ತಂಡವನ್ನು ಮುನ್ನಡೆಸುವ ಸಲುವಾಗಿ ಇದ್ದ ಒತ್ತಡವೇ ನನ್ನನ್ನು ಇನ್ನಷ್ಟು ಉತ್ತಮವಾಗಿ ಆಡುವಂತೆ ಪ್ರೇರಣೆ ಕೊಟ್ಟಿತು. ಹೀಗಾಗಿ ಒತ್ತಡ ನನಗೊಂದು ಸಮಸ್ಯೆಯಾಗಿ ಯಾವತ್ತೂ ಕಾಣಿಸಲಿಲ್ಲ.  ಎಂದು ಹೇಳುತ್ತಾರೆ.

ಇದೀಗ ಕರ್ನಾಟಕ ರಾಜ್ಯ ಕ್ರಿಕೆಟ್ ಮಂದಳಿಯ ಕೆಲಸಗಳಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡಿರುವ ಶಾಂತಾ ಕ್ರಿಕೆಟ್ ಕ್ಷೇತ್ರಕ್ಕೆ  ಇನ್ನೂ ಏನಾದರೂ ಕೊಡುಗೆ ನೀಡಬೇಕು ಎನ್ನುವ ಹುಮ್ಮಸ್ಸಿನಲ್ಲಿದ್ದಾರೆ. ಕ್ರಿಕೆಟ್ ಅನ್ನು ಇನ್ನಷ್ಟು ಎತ್ತರಕ್ಕೆ ಕೊಂಡೊಯ್ಯಬೇಕೆಂದು ಬಯಸುತ್ತಾರೆ.  ಇಂದಿನ ಯುವತಿಯರು ಆಟದ ಮೇಲೆ ನಿಜವಾದ ಆಸಕ್ತಿ ಇದ್ದರೆ ಶ್ರದ್ದೆಯಿಂದ, ನಿಯತ್ತಾಗಿ ಆಡಬೇಕು. ಫಲಿತಾಂಶ ಅದಾಗಿಯೇ ಬರುತ್ತದೆ. ಪ್ರಾಮಾಣಿಕತೆ ಹಾಗೂ ಸಮರ್ಪಣಾ ಮನೋಭಾವ ಇಲ್ಲಿ ಮುಖ್ಯವಾಗುತ್ತದೆ. ಇವುಗಳಿದ್ದಲ್ಲಿ ಯಾರೂ ಯಾವ ಎತ್ತರಕ್ಕಾದರೂ ತಲುಪುವುದು ಅಸಾಧ್ಯವಲ್ಲ. ಹೀಗೆಂದು ಯುವ ಕ್ರೀಡಾಪಟುಗಳಿಗೆ ಸಂದೇಶ ತಿಳಿಸುವ ಶಾಂತಾ ರಂಗಸ್ವಾಮಿ ತಮ್ಮ ಆಟ ಮತ್ತು ಅದರಲ್ಲಿ ತಾವು ತೋರಿದ ಅದ್ಭುತ ಸಾಧನೆಗಳಿಂದ ಮಹಿಳಾ ಕ್ರಿಕೆಟಿಗರಿಗೆಲ್ಲಾ ಪ್ರೇರಣಾ ಶಕ್ತಿ ಎನಿಸಿದ್ದಾರೆ.

ಶಾಂತಾ ರಗಸ್ವಾಮಿ ಸಂಕ್ಷಿಪ್ತ ವಿಚಾರಗಳು

ಜನನ: ಜನವರಿ 1, 1954

ಸ್ಥಳ: ಚೆನ್ನೈ

ತಂದೆ–ತಾಯಿ:ಸಿ.ವಿ. ರಂಗಸ್ವಾಮಿ, ರಾಜಲಕ್ಷ್ಮಿ

ಒಡಹುಟ್ಟಿದವರು: ಏಳು ಸಹೋದರಿಯರು

ಶಿಕ್ಷಣ: ಮಹಿಳಾ ಸೇವಾ ಸಮಾಜ, ನ್ಯಾಷನಲ್‌ ಹೈಸ್ಕೂಲ್‌, ಕಾಲೇಜಿನಲ್ಲಿ ಪದವಿ ವ್ಯಾಸಂಗ

ವೃತ್ತಿ: ಕೆನರಾ ಬ್ಯಾಂಕ್‌, ಪ್ರಧಾನ ವ್ಯವಸ್ಥಾಪಕಿಯಾಗಿ ನಿವೃತ್ತಿ

***

ಮಹಿಳಾ ಕ್ರಿಕೆಟರ್ ಆಗಿ ಶಾಂತಾ ಅವರ ಸಾಧನೆ

ಬಲಗೈ ಬ್ಯಾಟ್ಸ್‌ಮನ್‌, ಆಲ್‌ರೌಂಡರ್‌

1976ರಿಂದ 1991: ರಣಜಿ, ಅಂತರರಾಷ್ಟ್ರೀಯ ಏಕದಿನ, ಟೆಸ್ಟ್‌ ಪಂದ್ಯಗಳಲ್ಲಿ ಸಕ್ರಿಯ

1976–1983: ರಾಷ್ಟ್ರೀಯ ತಂಡದ ನಾಯಕಿ

1976: ಅರ್ಜುನ ಪ್ರಶಸ್ತಿ

16 ಟೆಸ್ಟ್‌ ಪಂದ್ಯಗಳಲ್ಲಿ 750 ರನ್‌ ಬ್ಯಾಟಿಂಗ್‌ ರೇಟಿಂಗ್‌: 32.6

ಬೌಲಿಂಗ್‌ ರೇಟಿಂಗ್‌: 31.61

ಮಹಿಳಾ ಕ್ರಿಕೆಟರ್‌ಗಳಲ್ಲಿ ಶತಕ ಬಾರಿಸಿದವರಲ್ಲಿ ಮೊದಲ ಭಾರತೀಯರು

19 ಏಕದಿನ ಪಂದ್ಯಗಳಲ್ಲಿ 287 ರನ್‌, 12 ವಿಕೆಟ್‌

1982: ಮಹಿಳಾ ಕ್ರಿಕೆಟ್‌ ವರ್ಲ್ಡ್‌ ಕಪ್‌ನಲ್ಲಿ  (ನ್ಯೂಜಿಲೆಂಡ್‌) ಜೀವಮಾನದ ಸಾಧನೆ

ಪುರುಷರ ಪಂದ್ಯಕ್ಕೆ ಕಾಮೆಂಟರಿ, ರಾಷ್ಟ್ರೀಯ ಮಹಿಳಾ ಆಯ್ಕೆ ಸಮಿತಿ ಅಧ್ಯಕ್ಷೆಯಾಗಿ 2013ರಲ್ಲಿ ನಿವೃತ್ತಿ,  ಕ್ರಿಕೆಟ್‌ ಬರಹಗಾರರು.

2017: ಬಿಸಿಸಿಐ ನಿಂದ ಜೀವಮಾನ ಸಾಧನೆ ಪುರಸ್ಕಾರ

  
ಭಾರತ ಮಹಿಳಾ ಕ್ರಿಕೆಟ್ ತಂದದ ನಾಯಕಿಯಾಗಿದ್ದ ಹಿರಿಯ ಕ್ರಿಕೆಟ್ ಆಟಗಾರ್ತಿ ಶಾಂತಾ ರಂಗಸ್ವಾಮಿ ಅವರೊಡನೆ ನಡೆಸಿದ ಸಂದರ್ಶನ ಲೇಖನ.  ಈ ನನ್ನ ಲೇಖನವು ಗೃಹಶೋಭಾ ಮಾಸಪತ್ರಿಕೆ ಆಗಸ್ಟ್ 2017ರ ಸಂಚಿಕೆಯಲ್ಲಿ ಪ್ರಕಟವಾಗಿತ್ತು.

ಐಎಎಸ್ ಪರೀಕ್ಷೆಯಲ್ಲಿ ರಾಷ್ಟ್ರಮಟ್ಟದಲ್ಲಿ ಪ್ರಥಮ ರ್ಯಾಂಕ್ ಗಳಿಸಿದ ಕನ್ನಡ ಕುವರಿ ಕೆ.ಆರ್. ನಂದಿನಿ

‘ಶ್ರಮ, ಶ್ರದ್ಧೆ ಮತ್ತು ಛಲ ಇದ್ದರೆ ನಾಗರಿಕ ಸೇವಾ ಪರೀಕ್ಷೆಗಳಲ್ಲಿ ಯಶಸ್ಸು ಕಾಣಬಹುದು. ಅದಕ್ಕೆ ನೀವು ಯಾವ ಊರಲ್ಲಿದ್ದೀರಿ ಎನ್ನುವುದು ಮುಖ್ಯವಾಗುವುದಿಲ್ಲ. ಏಕಾಗ್ರತೆಯಿಂದ ಅಭ್ಯಾಸ ಮಾಡಿದರೆ ಯಾರೂ ಕೂಡ ಪರೀಕ್ಷೆಯಲ್ಲಿ ಯಶಸ್ಸು ಕಾಣಬಹುದು. ಯುಪಿಎಸ್ಸಿ ಪರೀಕ್ಷೆಯಲ್ಲಿ ಪಾಸಾಗಲು ದೆಹಲಿಯಲ್ಲೇ ಇದ್ದು ವಿಶೇಷ ತರಬೇತಿ ಪಡೆಯಬೇಕು ಎಂದೇನಿಲ್ಲ. ನಾನು ಪ್ರತಿನಿತ್ಯ ಎಂಟರಿಂದ ಹತ್ತು ಗಂಟೆಗಳ ಕಾಲ ಅಭ್ಯಾಸ ನಡೆಸುತ್ತಿದ್ದೆ. ಈ ನಿರಂತರ ಅದ್ಯಯನವೇ ಇಂದು ಫಲ ನೀಡಿದೆ.' 

ಇದು ಈ ಬಾರಿ ಕೇಂದ್ರ ಲೋಕ ಸೇವಾ ಆಯೋಗ (ಯುಪಿಎಸ್ಸಿ) ನಡೆಸಿದ ನಾಗರಿಕ ಸೇವಾ ಪರೀಕ್ಷೆ ಐಎಎಸ್ ನಲ್ಲಿ ಪ್ರಥಮ ರ್ಯಂಕ್ ಗಳಿಸಿ ಕರ್ನಾಟಕಕ್ಕೆ ಕೀರ್ತಿ ತಂದ ಕೆ.ಆರ್. ನಂದಿನಿ ಅವರ ನುಡಿಗಳು.

ಇತ್ತೀಚೆಗೆ ಯುಪಿಎಸ್ಸಿ ಪ್ರಕಟಿಸಿದ ಐಎಎಸ್ ಪರೀಕ್ಷಾ ಫಲಿತಾಂಶದಲ್ಲಿ ಇಡೀ ರಾಷ್ಟ್ರಕ್ಕೆ ಪ್ರಥಮ ಸ್ಥಾನಿಯಾಗಿ ಹೊರ ಹೊಮ್ಮಿದ ನಂದಿನಿ ಅವರದ್ದು ನಿಜಕ್ಕೂ ದೊಡ್ಡ ಸಾಧನೆಯೇ ಸರಿ. ಕೋಲಾರ ಜಿಲ್ಲೆ ಕೆಂಬೋಡಿ ಗ್ರಾಮದವರಾದ ನಂದಿನಿ ತಂದೆ ಕೆ..ರಮೇಶ್ ಸರ್ಕಾರಿ ಶಾಲಾ ಶಿಕ್ಷಕರಾಗಿದ್ದರೆ ತಾಯಿ ವಿಮಲಾ ಸಹ ಉತ್ತಮ ಗೃಹಿಣಿಯಾಗಿದ್ದಾರೆ. ಮನೆಯಲ್ಲಿನ ತಾಯಿ ತಂದೆಯರ ಪ್ರೋತ್ಸಾಹದೊಂದಿಗೆ ಕೋಲಾರದ ಪರಿಸರವೂ ಇವರ ಐಎಎಸ್ ಆಸೆಗೆ ನೀರೆದಿದಿದೆ.

ನಂದಿನಿ ಐದನೇ ತರಗತಿಯಲ್ಲಿದ್ದಾಗಲೇ ಅವರಿಗೆ ತಾವು ಮುಂದೆ ಜಿಲ್ಲಾಧಿಕಾರಿಯಾಗಬೇಂದು ಕನಸು ಚಿಗುರಿತ್ತು. ತಂದೆ ರಮೇಶ್ ಅವರೊಡನೆ ಕೋಲಾರ ಜಿಲ್ಲೆಯ ವಿವಿಧ ಗ್ರಾಮಗಳಿಗೆ ತೆರಳಿ ಸಾಕ್ಷರತಾ ಆಂದೋಲನದ ಕಾರ್ಯಕ್ರಮಗಳಲ್ಲಿ ಭಾಗವಹಿಸುತ್ತಿದ್ದ ನಂದಿನಿಗೆ ಆ ಕಾರ್ಯಕ್ರಮದಲ್ಲಿ ಅವರೊಡನೆ ಭಾಗವಹಿಸುತ್ತಿದ್ದ ಜಿಲ್ಲಾಧಿಕಾರಿಗಳು, ಉಪ ವಿಭಾಗಾಧಿಕಾರಿಗಳನ್ನು ಹತ್ತಿರದಿಂದ ಗಮನಿಸುವ ಅವಕಾಶ ಸಿಕ್ಕಿತ್ತು. ಅದನ್ನು ಉತ್ತಮವಾಗಿ ಬಳಸಿಕೊಂಡ ನಂದಿನಿ ಅವರ ಕಾರ್ಯವೈಖರಿಗಳನ್ನು ಗಮನಿಸುತ್ತಿದ್ದು ಮುಂದೊಂದು ದಿನ ತಾನೂ ಅವರಂತೆಯೇ ಾಧಿಕಾರಿಯಾಗಬೇಕೆಂದು ಕನಸು ಕಟ್ಟಿದ್ದರು.

ಕೋಲಾರದ ಚಿನ್ಮಯ ವಿದ್ಯಾಲಯದಲ್ಲಿ 1 ರಿಂದ 10 ನೇ ತರಗತಿವರೆಗೆ ಓದಿದ ನಂದಿನಿ   2006 ರಲ್ಲಿ 10 ನೇ ತರಗತಿ ವಿದ್ಯಾಭ್ಯಾಸ ಮುಗಿಸಿದ್ದರು ಮೂಡಬಿದಿರೆಯ ಆಳ್ವಾಸ್ ಕಾಲೇಜಿನಲ್ಲಿ ಪಿಯುಸಿ ವಿದ್ಯಾಭ್ಯಾಸ ನಡೆಸಿದ್ದರು. 2008 ರಲ್ಲಿ ದ್ವಿತೀಯ ಪಿಯು ಮುಗಿಸಿ ಬೆಂಗಳೂರಿನ ಎಂ.ಎಸ್. ರಾಮಯ್ಯ ಇಂಜಿನಿಯರಿಂಗ್ ಕಾಲೇಜಿನಲ್ಲಿ ಸಿವಿಲ್ ಇಂಜಿನಿಯರಿಂಗ್ ವಿಷಯದಲ್ಲಿ ಪದವಿ ಪಡೆದರು. ಪದವಿ ಮುಗಿಸಿದ ನಂದಿನಿ ಕೆಲವು ಕಾಲ ಲೋಕೋಪಯೋಗಿ ಇಲಾಖೆಯಲ್ಲಿ ಸೇವೆ ಸಲ್ಲಿಸಿದ್ದರು. ಐಎಎಸ್ ಅಧಿಕಾರಿ ಆಗಬೇಕೆಂಬ ಹಂಬಲ ಅವರನ್ನು ದೆಹಲಿಗೆ ತೆರಳುವಂತೆ ಮಾಡಿತು. ಅಲ್ಲಿ ಕರ್ನಾಟಕ ಭವನದಲ್ಲಿ ಸಹಾಯಕ ಇಂಜಿನಿಯರ್ ಆಗಿ ಸೇರಿಕೊಂಡರು.

2014 ರಲ್ಲಿ ಪ್ರಥಮ ಬಾರಿಗೆ ಯುಪಿಎಸ್ಸಿ ಪರೀಕ್ಷೆ ಬರೆದಿದ್ದ ನಂದಿನಿ 849 ನೇ ರ್ಯಾಂಕ್ ಪಡೆದಿದ್ದರು. ರ್ಯಾಂಕಿಂಗ್ ಕಡಿಮೆ ಇದ್ದ ಕಾರಣ ಭಾರತೀಯ ಕಂದಾಯ ಸೇವೆ (ಐಆರ್ ಎಸ್) ವಿಭಾಗದಲ್ಲಿ ಆಯ್ಕೆ ಆಗಿದ್ದರು. ಆದರೆ ಐಎಎಸ್ ಆಗುವ ಆಸೆ ಬತ್ತಿರಲಿಲ್ಲ. ಅದಕ್ಕಾಗಿ ದೆಹಲಿಯಲ್ಲಿ ಕೆಲ ತಿಂಗಳು ತರಬೇತಿ ಪಡೆದಿದ್ದು ಬೆಂಗಳೂರಿನ ವಿಜಯನಗರದ ‘ಇನ್ಸೈಟ್ ಐಎಎಸ್’ ಸಂಸ್ಥೆಯಲ್ಲಿ 10 ತಿಂಗಳು ಅಧ್ಯಯನ ನಡೆಸಿದ್ದರು. ಎಂದರೆ ಅದು ಯಾವುದೇ ಬಗೆಯ ವಿಶೇಷ ತರಬೇತಿ ಆಗಿರದೆ ಪರೀಕ್ಷೆಗೆ ಅಗತ್ಯವಾದ ಅದ್ಯಯನ ಸಾಮಗ್ರಿಗಳಷ್ಟೇ ದೊರೆಯುವ ತಾಣವಾಗಿತ್ತು. 

ಹೀಗೆ ತರಬೇತಿ, ಅದ್ಯಯನ ನಡೆಸಿದ್ದ ನಂದಿನಿ ಮತ್ತೆ 2016 ರಲ್ಲಿ  ಐಎಎಸ್ ಪರೀಕ್ಷೆ ಬರೆದಿದ್ದರು. ಹಾಗೆ ಬರೆದ ಪರೀಕ್ಷೆಯಲ್ಲಿ ಮೊದಲನೇ ರ್ಯಾಂಕ್ ಪಡೆದು ಸಾಧನೆ ಮಾಡಿ ಎಲ್ಲರಿಗೂ ಮಾದರಿ ಆಗಿದ್ದಾರೆ.

'ಹುಟ್ಟಿನಿಂದಲೇ ಯಾರೂ ಬುದ್ದಿವಂತರಾಗಿರುವುದಿಲ್ಲ. ನಾನೂ ಅದಕ್ಕೆ ಹೊರತಾಗಿಲ್ಲ' ಎನ್ನುವ ನಂದಿನಿಗೆ ಗಣಿತವೆಂದರೆ ಅತ್ಯಂತ ಕಷ್ಟದ ವಿಷಯ  ಅದು 'ಕಬ್ಬಿಣದ ಕಡಲೆ' ಎನ್ನುವ ಇವರು ಶಾಲಾ ದಿನಗಳಿಂದಲೇ ಗಣಿತ ಹೊರತುಪಡಿಸಿ ಎಲ್ಲಾ ವಿಷಯದಲ್ಲೂ ಟಾಪ್ ಬರುತ್ತಿದ್ದರು. ಗಣಿತ ಏಕೆ ಕಷ್ಟವಾಗುತಿತ್ತು ಎಂಬುದು ಇಂದಿಗೂ ನನಗೆ ಯಕ್ಷಪ್ರಶ್ನೆಯಾಗೆಯೇ ಉಳಿದಿದೆ. ಎನ್ನುತ್ತಾರೆ.

ಕನ್ನಡ ಸಾಹಿತ್ಯ ಎಂದರೆ ನಂದಿನಿಗೆ ಅಚ್ಚು ಮೆಚ್ಚಾಗಿದ್ದು ಐಎಎಸ್ ಪರೀಕ್ಷೆಯಲ್ಲಿಯೂ ಇದನ್ನೇ ಐಚ್ಚಿಕ ವಿಷಯವಾಗಿ ಆಯ್ಕೆ ಮಾಡಿಕೊಂಡಿದ್ದರು. ಬಿಡುವಿನ ಸಮಯದಲ್ಲಿ ಕನ್ನಡ ಸಾಹಿತ್ಯಗಳನ್ನು ಓದುತ್ತೇನೆ. ನನ್ನ ಜೀವನದ ಮೇಲೆ ಕನ್ನಡ ಸಾಹಿತ್ಯ ಸಾಕಷ್ಟು ಪ್ರಭಾವ ಬೀರಿದೆ. ಎನ್ನುವ ಇವರು ಪ್ರೊ. ನರಹಳ್ಳಿ ಬಾಲಸುಬ್ರಹ್ಮಣ್ಯ ಅವರ ಬಳಿ ಕನ್ನಡ ವಿಷಯದ ತರಬೇತಿ ಪಡೆದಿದ್ದರು.

ಪ್ರಸ್ತುತ ನಂದಿನಿ ಹರಿಯಾಣದ ಫರೀದಾಬಾದ್ನ ನ್ಯಾಷನಲ್ ಅಕಾಡೆಮಿ ಆಫ್ ಕಸ್ಟಮ್ಸ್, ಎಕ್ಸೈಸ್ ಅಂಡ್ ನಾರ್ಕೊಟಿಕ್ಸ್ನಲ್ಲಿ ತರಬೇತಿ ಪಡೆಯುತ್ತಿದ್ದು ಹೀಗೆ ತರಬೇತಿಯಲ್ಲಿದ್ದಾಗಲೇ ಇನ್ನೊಮ್ಮೆ ಪರೀಕ್ಷೆ ಬರೆದು ಪ್ರಥಮ ರ್ಯಾಂಕ್ ಗಳಿಸಿ ಸಾಧನೆ ತೋರಿದ್ದಾರೆ.

 “ಐಎಎಸ್ ಅಧಿಕಾರಿಯಾಗಿ ಭಾರತೀಯರ ಸೇವೆ ಮಾಡಬೇಕೆಂಬುದೇ ನನ್ನ ಮಹದಾಸೆ. ಐಎಫ್ಎಸ್ ಸೇವೆ ಸೇರುವುದಿಲ್ಲ. ಐಎಎಸ್ ಅಧಿಕಾರಿಯಾಗಿ ಸಿಕ್ಕಿರುವ ಈ ಅವಕಾಶವನ್ನು ಬಳಸಿಕೊಂಡು ಜನ ಸೇವೆ ಮಾಡಲಿದ್ದೇನೆ. ದೇಶದ ಎಲ್ಲಾ ಕ್ಷೇತ್ರಗಳೂ ಅಭಿವೃದ್ದಿಯಾಗಬೇಕಿದೆ. ಹೀಗಾಗಿ ಇಂಥದೇ ಕ್ಷೇತ್ರವೆಂದು ಹೇಳಲಾರೆ. ಯಾವುದೇ ವಲಯದಲ್ಲಿಯೂ ಸಾರ್ವಜನಿಕ ಹಿತಾಸಕ್ತಿಯನ್ನು ಕಾಪಾಡಿಕೊಂಡು ಶ್ರದ್ದೆಯಿಂದಲೂ, ಖುಷಿಯಿಂದಲೂ ಕರ್ತವ್ಯ ನಿರ್ವಹಿಸುವುದು ನನ್ನ ಯೋಜನೆಯಾಗಿದೆ.” ಎಂದೆನ್ನುವ ನಂದಿನಿ ಗಳಿಸಿದ್ದು ಈ ಪರೀಕ್ಷೆಯಲ್ಲಿ ಗಳಿಸಿದ್ದು  ಶೇ.55.3 ಅಂಕಗಳನ್ನು ಎಂದರೆ ಎಂತಹವರಿಗೂ ಅಚ್ಚರಿ ಆಗದಿರದು. ಮುಖ್ಯ ಲಿಖಿತ ಪರೀಕ್ಷೆ ಹಾಗೂ  ಇಂಟರ್’ವ್ಯೂವ್ ಸೇರಿದಂತೆ ಒಟ್ಟು 2,025 ಅಂಕಗಳಿಗೆ ನಂದಿನಿ 1,120 ಅಂಕಗಳನ್ನು ಪಡೆದಿದ್ದಾರೆ. ಕೇಂದ್ರ ಲೋಕಸೇವಾ ಆಯೋಗ ಬಿಡುಗಡೆ ಮಾಡಿದ ಅಧಿಕೃತ ಅಂಕಪಟ್ಟಿಯಲ್ಲಿ ಈ ಅಂಶ ತಿಳಿಸಲಾಗಿದೆ.

ಭವಿಷ್ಯದಲ್ಲಿ ಯುಪಿಎಸ್ಸಿ ಪರೀಕ್ಷೆ ಬರೆಯುವ ಅಭ್ಯರ್ಥಿಗಳಿಗೆ ನಂದಿನಿ ನೀಡುವ ಸೂಚನೆಗಳು ಹೀಗಿದೆ-

“ನಮ್ಮಲ್ಲಿ ಸಾಧಿಸಬೇಕೆನ್ನುವ ಸ್ಪಷ್ಟ ಛಲವಿರಬೇಕು. ಅದಕ್ಕೆ ಬೇಕಾದ ಮಾರ್ಗದಲ್ಲಿ ಸೂಕ್ತ ಮಾರ್ಗದರ್ಶನ ಪಡೆದು ಸಾಗಿದರೆ ಗುರಿ ತಲುಪುವುದು ಖಚಿತ. ಗ್ರಾಮೀಣ ಪ್ರದೇಶದ ರೈತಾಪಿ ಕುಟುಂಬದಿಂದ ಬಂದ ಮಧ್ಯಮ ವರ್ಗದ ಅಭ್ಯರ್ಥಿಗಳಿಗೆ ಆರಂಭದಲ್ಲಿ ಈ ಪರೀಕ್ಷೆಗಳ ಬಗ್ಗೆ ಮಾಹಿತಿ ಗೊತ್ತಿರದ ಕಾರಣಕ್ಕೆ ಕಠಿಣ ಎನಿಸುತ್ತವೆ. ಅದಕ್ಕೆ ಕೆಲ ಕಾಲ ಸೂಕ್ತ ಮಾರ್ಗದರ್ಶನ ಪಡೆದು ತರಬೇತಿ ಕೇಂದ್ರಗಳಿಗೆ ಹೋಗಿ ಪರೀಕ್ಷಾ ತಯಾರಿ ಬಗ್ಗೆ ಮಾಹಿತಿ ಪಡೆದುಕೊಳ್ಳುವುದು ಮಾಡಿದಾಗ ಅವರಿಗೂ ಪರೀಕ್ಷೆಗಳು ಸುಲಭವಾಗುತ್ತದೆ.

“ಇಂಜಿನಿಯರಿಂಗ್ ಮತ್ತು ವೈದ್ಯಕೀಯ  ಹಿನ್ನೆಲೆ ಇರುವವರಿಗೆ ಗಣಿತ, ವಿಜ್ಞಾನ, ಇಂಗ್ಲಿಷ್ ಭಾಷೆ ಮತ್ತು ಸಂವಹನದ ಮೇಲೆ ಹಿಡಿತ ಇರುತ್ತದೆ. ಇವು ಕನ್ನಡ ಮಾಧ್ಯಮದ ಅಭ್ಯರ್ಥಿಗಳಿಗೆ ಹಾಗೂ ಕಲಾ ವಿಭಾಗದವರಿಗೆ ಸ್ವಲ್ಪ ಕಷ್ಟವಾಗಬಹುದು. ಆದರೆ ಛಲ, ಆತ್ಮವಿಶ್ವಾಸವಿದ್ದಲ್ಲಿ ಯಾವುದೂ ಅಸಾಧ್ಯವಲ್ಲ. ಅಧ್ಯಯನ ಸಾಮಗ್ರಿಗಳನ್ನು ಸಿದ್ಧವಾಗಿಟ್ಟುಕೊಂಡು ಓದುವುದನ್ನೇ ಕಾಯಕ ಮಾಡಿಕೊಳ್ಳಬೇಕು. ಯಾವುದೇ ಒಂದು ವಿಭಾಗ ಅಥವಾ ಕ್ಷೇತ್ರವನ್ನು ಆಯ್ಕೆ ಮಾಡಿಕೊಂಡು ಅದರಲ್ಲಿ ಅತ್ಯುತ್ತಮ ನಿರ್ವಹಣೆ ತೋರಲು ಪ್ರಯತ್ನಿಸಬೇಕು. ಇದೆಲ್ಲದರೊಡನೆ ಸೋಲು, ಗೆಲುವನ್ನು ಸಮಾನ ಭಾವನೆಯಿಂದ ಸ್ವೀಕರಿಸುವ ಚಿಂತನೆ ಬೆಳೆಸಿಕೊಳ್ಳಬೇಕು.

“ಮಹಿಳೆಯರ ವಿಚಾರಕ್ಕೆ ಬರುವುದಾದರೆ ಯುಪಿಎಸ್ಸಿ ಪರೀಕ್ಷೆಯಲ್ಲಿ ಪುರುಷರಷ್ಟು ಪ್ರಮಾಣದಲ್ಲಿ ಮಹಿಳೆ ಯಶಸ್ಸು ಸಾಧಿಸಿಲ್ಲ ಎನ್ನುವುದನ್ನು ಒಪ್ಪಬೇಕಾಗುತ್ತದೆ. ಇದಕ್ಕೆ ಸಮಾಜದಲ್ಲಿ ಮಹಿಳೆಯರಿಗಿರುವ ಕಟ್ಟುಪಾಡುಗಳು ಪ್ರಮುಖ ಕಾರಣ ಎನ್ನಬಹುದು. ಆದರೆ ಇತ್ತೀಚೆಗೆ ಈ ಪರೀಕ್ಷೆಗಳಲ್ಲಿ ಆಯ್ಕೆಯಾಗುವವರಲ್ಲಿ ಮಹಿಳೆಯರ ಸಂಖ್ಯೆ ಕ್ರಮೇಣ ಹೆಚ್ಚುತ್ತಿದೆ. ಇದು ಒಳ್ಳೆಯ ಬೆಳವಣಿಗೆ ಎನ್ನಲೇಬೇಕು. ಹಿಂದೆಯೇ ಹೇಳಿದಂತೆ ಸಾಧಿಸುವ ಛಲವಿದ್ದಲ್ಲಿ ಸ್ಥಳ, ಜಾತಿ, ಲಿಂಗ ತಾರತಮ್ಯಗಳು ಅಡ್ಡಿ ಬರಲಾರವು.”

ಕೆ.ಆರ್. ನಂದಿನಿ ಕುರಿತಂತೆ ಕೆಲವು ಕಿರು ಮಾಹಿತಿಗಳು

ಪೂರ್ಣ ಹೆಸರು - ಕೆಂಬೋಡಿ ರಮೇಶ್ ನಂದಿನಿ (ಕೆ.ಆರ್. ನಂದಿನಿ)

ಹುಟ್ಟಿದ ದಿನಾಂಕ ಮತ್ತು  ಸ್ಥಳ -  10-09-1990 ,  ಕೋಲಾರದ ಕೆಂಬೋಡಿ

ತಂದೆ-ತಾಯಿ ಕುಟುಂಬ ವರ್ಗ  - ಕೆ. ರಮೇಶ್ ಹಾಗೂ ವಿಮಲ (ತರುಣ್ ಪಟೇಲ್ ಹೆಸರಿನ ಓರ್ವ ತಮ್ಮನಿದ್ದಾನೆ)

10 ನೇ ತರಗತಿ -ಚಿನ್ಮಯ ವಿದ್ಯಾಲಯ, ಕೋಲಾರ (2006 ರಲ್ಲಿ 96.8 ಅಂಕಗಳೊಂದಿಗೆ ತೇರ್ಗಡೆ)

ದ್ವಿತೀಯ ಪಿಯು - ಆಳ್ವಾಸ್ ಪಿಯು ಕಾಲೇಜು, ಮೂಡಬಿದಿರೆ (2008 ರಲ್ಲಿ 94.8 ಅಂಕಗಳೊಂದಿಗೆ ತೇರ್ಗಡೆ)

ಪದವಿ - ಎಂ.ಎಸ್. ರಾಮಯ್ಯ ಇಂಜಿನಿಯರಿಂಗ್ ಕಾಲೇಜು, ಬೆಂಗಳೂರು (ಸಿವಿಲ್ ಇಂಜಿನಿಯರಿಂಗ್ ವಿಭಾಗದಲ್ಲಿ ಉನ್ನತ ಶ್ರೇಣಿಯಲ್ಲಿ ತೇರ್ಗಡೆ)

ಹುದ್ದೆ - ಐಆರ್ ಎಸ್ ಅಧಿಕಾರಿ (ಪ್ರಸ್ತುತ ಹರಿಯಾಣದ ಫರೀದಾಬಾದ್ನ ನ್ಯಾಷನಲ್ ಅಕಾಡೆಮಿ ಆಫ್ ಕಸ್ಟಮ್ಸ್, ಎಕ್ಸೈಸ್ ಅಂಡ್ ನಾರ್ಕೊಟಿಕ್ಸ್ನಲ್ಲಿ ತರಬೇತಿ ಪಡೆಯುತ್ತಿದ್ದಾರೆ)

ಐಎಎಸ್ ಪರೀಕ್ಷೆಯಲ್ಲಿ ಗಳಿಸಿದ್ದ ಅಂಕಗಳು – 1120 (ಮುಖ್ಯ ಪರೀಕ್ಷೆಯಲ್ಲಿ 927, ಇಂಟರ್ ವ್ಯೂವ್ ನಲ್ಲಿ 193) ಒಟ್ಟಾರೆ ಶೇ.55.3

ಐಎಎಸ್ ಪರೀಕ್ಷೆಯಲ್ಲಿ ಆಯ್ಕೆ ಮಾಡಿಕೊಂಡ ಐಚ್ಚಿಕ ವಿಷಯ - ಕನ್ನಡ ಸಾಹಿತ್ಯ

2014 ರಲ್ಲಿ ಪ್ರಥಮ ಬಾರಿಗೆ ಪರೀಕ್ಷೆ ಬರೆದಿದ್ದಾಗ ಪಡೆದ ರ್ಯಾಂಕ್ – 849

ಕರ್ನಾಟಕದಿಂದ ಯುಪಿಎಸ್ಸಿ ಪರೀಕ್ಷೆ ಬರೆದು ಪ್ರಥಮ ರ್ಯಾಂಕ್ ಗಳಿಸಿದವರಲ್ಲಿ ನಂದಿನಿ ಎರಡನೆಯವರಾಗಿದ್ದಾರೆ. ಇದಕ್ಕೂ ಮುನ್ನ 16 ವರ್ಷಗಳ ಹಿಂದೆ  2001 ರಲ್ಲಿ ವಿಜಯಲಕ್ಷ್ಮಿ ಬಿದರಿ ಈ ಸಾಧನೆ ಮಾಡಿದ್ದರು.

 

(ಈ ಲೇಕನವು ಆಗಸ್ಟ್ 2017 ರ 'ಗೃಹಶೋಭಾ' ಮಾಸಪತ್ರಿಕೆಯಲ್ಲಿ ಪ್ರಕಟವಾಗಿದೆ.)